hadhwanaagnews
Wasiirka wasaaradda arrimaha dibedda Somaliland, Mudane Cabdiraxmaan Daahir Aadan, ayaa lagu soo dhaweeyay garoonka diyaaradaha MSP ee gobolka Minnesota.
Wasiirka ayay halkaasi waxa ku soo dhaweeyeen Qurba-joogta reer Somaliland ee dalka Maraykanka gaar ahaan gobolka Minnesota, qaybahooda kala duwan, kuwaasi oo wasiirka u muujiyay taageerada ay dalkooda la garab taagan yihiin iyo dedaalka ay dhankooda kaga jiraan Aqoonsiga Somaliland.
Inta uu wasiirku ku sugan yahay dalka Mareykanka, waxaa la filaya inuu la kulmo masuuliyiin xilal sare ka haya dalkaasi, Qurba-joogta Somaliland iyo mudan kale oo adduunka ka mid ah, waxaanu sii shidaalin doonaa wasiirku qadiyada Aqoonsiga Somaliland ee dalka Maraykanka oo meel wanaagsan maraysay, taasi oo uu si toos ah uga hawl gali doono.
Dowladda Mareykanka ayaa siweyn ugu soo jeesatay sidii ay Somaliland ugu aqoonsan lahayd dal madax banaan, waxa hadda dabaysha ictiraafku ay tahay mid ka taagan dalka Mareykanka, iyada oo mudaneyaal ka tirsan aqalka Mareykanku ay isu taageen sidii JSL, aqoonsigeeda ugu dadaali lahaayeen.
Wasiirka arrimaha dibada Jamhuuriyadda Somaliland Mudane Cabdiraxmaan Daahir Aadan oo ah masuul aqoon fiican u leh siyaasadda dalka Maraykanka in badana ka shaqaynayay ayaa la filayaa inuu dedaal dheeraad ah geliyo kor u qaadsita dhaq-dhaqaaqa qadiyada Aqoonsiga Somaliland ee dalka Maraykanka iyo sidii uu bulshada Somaliland ee dalkaasi u hawlgalin lahaa.
Afhayeenka madaxweynaha Jamhuuriyadda Somaliland Md. Xuseen Aadan Cige (Deyr), ayaa ku sifeeyay in tallaabada madaxweynaha Soomaaliya, Xasan Sheekh Maxamuud uu ugu bandhigay Maraykanka inuu ku wareejinayo dekedda iyo madaarka Berbera ay tahay tusaale dhammaystiran oo fasiraya beenta iyo dawladnimada fashilantay ee Soomaaliya.
