hadhwanaagnews
Wasaaradda Waxbarashadsa Somaliland ayaa shaacisay in Imtixaannada shahaadiga ahaa ee fasalka 8-aad ee sannadkan 2025 uu si si guul ah oo nabdoon ku soo gabagaboobay shalay. Xafladda xidhitaanka, oo lagu qabtay magaalada Boorama ee xarunta Gobolka Awdal, waxaa hogaaminayay Wasiirka Waxbarashada iyo Sayniska, Prof. Ismaacil Ducaale Yuusuf, oo si rasmi ah u shaaciyay in uu soo dhammaaday imtixaannada fasalada 8aad.
Munaasabadda waxaa ka soo qayb galeen Guddoomiyaha Gobolka Awdal Maxamed Axmed Cige, Duqa Magaalada Boorama Maxamuud Sh. Ibrahim Muuse, iyo Guddoomiyaha Waxbarashada Gobolka Awdal Xuseen Caateye Fariid. Wasiirka Prof Ismaaciil wuxuu ammaanay dadaalka masuuliyiinta, barayaasha, iyo shaqaalaha hubinayey in imtixaannadu si habsami leh u socdaan una soo dhamaadaan, isagoo u saadaaliyey ardayda inay gaadhaan natiijooyin wanaagsan.
Xaflad kale oo ka dhacday Berbera, Gobolka Saaxil, Wasiiru-dawlaha ee Waxbarashada iyo Sayniska, Maxamed Yusuf Ibraahim, ayaa shaaciyey in imtixaanadii fasalada 8aad soo dhamaadeen.
Guddoomiyaha Xafiiska Imtixaannada Qaranka, Daud Axmed Faarax, oo uu weheliyo Guddoomiyaha Waxbarashada Maroodi-jeex Maxamed Xuseen, ayaa xaqiijiyay in imtixaannada fasalada sideedaad si nabad ah loogu soo gabagabeeyay dalka oo dhan. "Juun 24, 2025, shalay, imtixaannada shahaadiga fasalka 8-aad ayaa si guul ah loogu soo gabagabeeyay Somaliland oo dhan iyada oo aan wax khalkhal ahi dhicin,” ayuu Daud u sheegay saxaafadda.
"Ilaahay ha ka barakeeyo dadaalka ardayda oo ha siiyo guul,” ayuu Wasiir Prof Ismaaciil ku soo gabagabeeyey hadalkiisa. Natiijooyinka waxaa la filayaa in lagu dhawaaqo bilaha soo socda.
