hadhwanaagnews
Ku dhawaad 2.4 milyan oo cod-bixiyeyaal ah oo ku nool Gobolka Is-maamulka Bangsamoro ee Muslimiinta Mindanao (BARMM), koonfurta Filibiin, ayaa maanta oo Isniin ah u dareeray goobaha cod-bixinta, iyagoo ka qayb qaadanaya doorashadii ugu horreysay ee baarlamaanka gobolka tan iyo markii la aas-aasay sannadkii 2019.
Doorashadan ayaa loo arkaa tallaabo taariikhi ah oo dhanka is-maamulka ah, iyadoo gobolka oo ay Muslimiintu u badan yihiin uu muddo tobanaan sano ah wajahayay kacdoonno iyo rabshado. Doorashada baarlamaanka ayaa sidoo kale timid kaddib dib-u-dhacyo dhowr sano socday.
Waxaa loo tartamayaa 80 kursi oo ka tirsan baarlamaanka Bangsamoro, kaas oo ah hay’adda sharci-dejinta ee gobolka. Kuraasta ayaa loo qaybinayaa 40 wakiil oo ka socda xisbiyada siyaasadda, 32 wakiil oo matalaya degmooyinka iyo siddeed wakiil oo matalaya qaybaha kala duwan ee bulshada.
Mas’uuliyiinta doorashada ayaa sheegay inay rajeynayaan in ka-qaybgalka cod-bixiyeyaashu uu gaaro ugu yaraan 80 boqolkiiba, maadaama doorashadan loo arko mid muhiim u ah dhismaha hay’adaha is-maamulka iyo mustaqbalka siyaasadeed ee Bangsamoro.
Hase yeeshee, jawiga doorashada ayaa waxaa hareeyay dhacdo amni, kaddib markii saddex qof ay ku dhinteen, 15 kalena ay ku dhaawacmeen rasaas ka dhacday wax yar ka hor furitaanka goobaha cod-bixinta.
Taliyaha Booliiska Cotabato, Jibin Bongcayao, ayaa sheegay in rasaastu dhacday wax yar ka hor saqdii dhexe, xilli xubno ka tirsan kooxo siyaasadeed oo iska soo horjeeda ay isku dayayeen inay noqdaan kuwii ugu horreeyay ee codkooda dhiibta.
Doorashadan ayaa si weyn isha loogu hayaa, maadaama ay noqonayso markii ugu horreysay ee shacabka Bangsamoro ay si toos ah u doortaan baarlamaan u gaar ah, taas oo qayb ka ah heshiiskii lagu dhisay nidaamka is-maamulka gobolka.
