hadhwanaagnews
Guddoomiyaha Xafiiska Imtixaannaadka Qaranka Jamhuuriyadda Somaliland, Daa’uud Axmed Faarax, ayaa caddeeyey in wareegtada ay Hay’adda Shaqaalaha Dawladdu ku fasaxday shaqaalaha maalinta Sabtida ee ku beegan 27-ka Juun 2026 aanay wax saamayn ah ku yeelan doonin qabsoomidda imtixaanka shahaadiga ah ee dalka.
Guddoomiyuhu waxa uu sheegay in dhammaan diyaar-garowgii imtixaanka uu u socdo sidii loogu talo galay, isla markaana aan wax isbeddel ahi ku iman jadwalkii iyo wakhtigii loo asteeyey inuu imtixaanku ka qabsoomo gobollada iyo degmooyinka Jamhuuriyadda Somaliland.
Imtixaanku Wuxuu U Dhacayaa Sidii Loo Qorsheeyey
Daa’uud Axmed Faarax ayaa u xaqiijiyey ardayda, waalidiinta iyo guud ahaan bulshada Somaliland in aan wax isbeddel ahi ku iman qabsoomidda imtixaanka shahaadiga ah.
Waxa uu xusay in fasaxa shaqaalaha dawladda aanu saamayn ku yeelanayn nidaamka iyo jadwalka imtixaannada qaranka.
Baaq Ku Socda Ardayda
Guddoomiyaha Xafiiska Imtixaannaadka Qaranka ayaa ugu dambayn ugu baaqay ardayda inay si buuxda ugu diyaar garoobaan gelitaanka imtixaanka, isaga oo sheegay in imtixaanku ku qabsoomi doono wakhtigii loo qorsheeyey.
Waxa uu ku boorriyey ardayda inay diiradda saaraan waxbarashadooda oo ay galaan imtixaanka iyagoo diyaar u ah.
