hadhwanaagnews
Ciidanka Dab-demiska ee Caasimadda Hargeysa, gaar ahaan qaybta Degmada Maxamuud Haybe, ayaa ku guuleystay inay ka hortagaan khasaare hantiyeed oo ballaadhan kadib markii uu dab ka kacay meel ku dhow Geerashka Ilma Jaamac Good.
Dabkan ayaa qabsaday dhir iyo taayiro ku hareeraysnaa geerashka, kaas oo ku yaalla kasoo horjeedka Dugsiga Maxamuud Axmed Cali ee magaalada Hargeysa.
Dabkii Oo Si Degdeg Ah Loo Damiyey
Ciidanka Dab-demiska ayaa si degdeg ah uga jawaabay gurmadka, iyaga oo ku guuleystay daminta dabka ka hor intii aanu ku fidin gaadiid tiro badan oo yaallay goobta geerashka.
Saraakiisha Dab-demiska ayaa sheegay in hawlgalka lagu guuleystay in dabka lagu bakhtiiyo halkii uu ka bilaabmay, si looga hortago inuu gaadho gaadiidka iyo hantida kale ee goobta u dhaweyd.
Digniin Loo Diray Mulkiileyaasha Geerashyada
Ciidanka Dab-demiska ayaa ugu baaqay mulkiileyaasha geerashyada iyo goobaha lagu kaydiyo gaadiidka inay taxaddar dheeraad ah muujiyaan, gaar ahaan xilligan kulaylaha oo halista dabku sare u kacdo.
Waxay sidoo kale ku wargeliyeen inay ka fogaadaan wax kasta oo sababi kara dab, isla markaana ay si joogto ah ula socdaan goobaha ay ku kaydsan yihiin taayirrada, shidaalka iyo agabka kale ee guban kara.
Ka Hortagga Khasaare Hantiyeed
Ciidanka Dab-demiska Hargeysa ayaa xusay in hal dhimbiil oo dab ahi ay sababi karto gubashada hanti badan xilliga xagaaga, sidaas darteedna loo baahan yahay feejignaan iyo taxaddar joogto ah.
Tallaabada degdegga ah ee ay qaadeen ciidanku ayaa ka hortagtay khasaare ballaadhan oo gaadhi lahaa gaadiidkii iyo hantidii kale ee taalay geerashka.
