hadhwanaagnews
Wasiirka Gaashaandhigga Israa’iil, Mudane Israel Katz, ayaa sheegay in Israa’iil iyo Somaliland ay muddo sannado ah si hoose isaga kaashanayeen arrimo amni iyo hawlgallo sir ah.
Wasiirka ayaa hadalkan ka jeediyey munaasabad uu ka qayb galay Madaxweynaha Jamhuuriyadda Somaliland, Mudane Cabdiraxmaan Maxamed Cabdillaahi (Cirro), isaga oo tilmaamay in xidhiidhka labada dhinac aanu ahayn mid cusub, balse uu salka ku hayo wada-shaqayn soo jirtay muddo dheer.
Iskaashi Amni oo Sii Ballaadhanaya
Israel Katz ayaa sheegay in labada dhinac ay hadda ka shaqaynayaan sidii loo sii ballaadhin lahaa iskaashiga dhinaca amniga iyo xoojinta wada-shaqaynta istaraatiijiga ah ee ka dhaxaysa Somaliland iyo Israa’iil.
Waxa uu xusay in xidhiidhka labada dal uu galay marxalad cusub oo ku salaysan dano wadaag iyo iskaashi dhinacyo badan leh.
Faahfaahin Dheeraad Ah Lama Bixin
Inkasta oo Wasiirku sheegay in labada dhinac ay iska kaashanayeen hawlgallo sir ah muddo sannado ah, haddana ma uu faahfaahin nooca hawlgalladaasi ahaayeen ama meelaha gaarka ah ee iskaashigu diiradda saarayey.
Sidoo kale, wax xog dheeraad ah lagama bixin qaabka iskaashigaasi u dhacay ama hay’adaha ku lugta lahaa.
Xidhiidhka Somaliland iyo Israa’iil oo Heer Cusub Gaadhay
Hadalka Wasiirka Gaashaandhigga Israa’iil ayaa ku soo beegmaya xilli ay Somaliland iyo Israa’iil si weyn u xoojinayaan xidhiidhkooda diblomaasiyadeed, amni iyo dhaqaale, iyadoo labada dhinac ay muujiyeen rabitaan ku aaddan ballaadhinta iskaashiga mustaqbalka.
Wararkan ayaa muujinaya heerka sii kobcaya ee xidhiidhka u dhexeeya Somaliland iyo Israa’iil, gaar ahaan dhinacyada amniga iyo istaraatiijiyadda.
