hadhwanaagnews
Mandaqadda Geesta Afrika oo ay inta badan ka taagan tahay qalalaase siyaasadeed xasillooni darro iyo khilaafkaad joogto ah, Somaliland waxay muujisay in tahay tusaale cad oo wax-ku-ool ah, kaas oo ku saabsan hirgelinta nabad waarta, xasillooni iyo dimuqraadiyad lagu dhisay dadaallo maxali ah oo ka madax-bannaan taageero caalami ah. Sida ay uga marag-kacayaan warbaahinta dunida iyo dublumaasiyiinta quwdaha dunidu, Somaliland waxay dhistay hay’ado shaqaynaya, waxay qabatay doorashooyin xor ah oo joogto ah, waxayna ilaalisay ammaankeeda gudaha muddo 34 sannood ah.
Dedaallada diblumaasiyadeed ee xukuumadda Jamhuuriyadda Somaliland ay muddadii u dambeysay sida hagar la’aanta ah u waday, ayaa noqday kuwo si muuqata uga midho dhaliyay himilada qaranimo ee dalka. Waxa ay horseedeen guulo la taaban karo oo dhanka siyaasadda ah, taasoo sababtay in dowladda Mareykanka ay dib u eegis ku samayso istiraatiijiyaddeeda ku wajahan Geeska Afrika, gaar ahaan siyaasaddeeda ku arrimaha aqoonsiga qadiyadda Somaliland.
Xukuumadda Somaliland waxay si dulqaad, waayo-aragnimo, iyo karti siyaasadeed leh u wajahday olole diblumaasiyadeed oo qoto dheer oo lagu hormarinayo qaddiyadda madax-bannaanida, iyadoo si xeeladaysan uga faa’iidaysanaysa isbeddellada joogtada ah ee ka socda gobolka Geeska Afrika. Arrimahasi oo ay ka mid yihiin: xasaradaha ka taagan Badda Cas, tartanka quwadaha waaweyn ee gobolka saameynta ku leh, iyo korodhka khataraha la xiidha kooxaha xagjirka ah. Isbeddelladani waxay abuureen xaalad cusub oo istiraatiiji ah, taasoo dawladda Mareykanka si cad ugu iftiiminaysa baahida ay u qabto in ay Somaliland la yeesho iskaashi qoto dheer oo ku saleysan isfahan dhab ah, dan-wadaag joogto ah, iyo ixtiraam labada dhinacba ah.
Sidoo kale, is-waafajinta u dhaxaysa aragtida siyaasadeed ee Somaliland iyo qiyamka ay dawladda Maraykanka ee la xidhiidha difaaca danaha qaranka, gaar ahaan Amniga, dimuqraadiyadda, xorriyadda, iyo dowladnimada hufan ayaa ah fursad aan la dayici karin. Somaliland waxay si cad u muujisay diyaar u ahaanshiyaha xidhiidh rasmi ah oo qotodheer oo ay la yeelato beesha caalamka, gaar ahaan dunida dimuqraadiga ah.
Warbaahinta waaweyn ee dunida iyo diblumaasiyiinta beesha caalamka ayaa si cad uga marag-furay horumarka ay Somaliland ka gaadhay dhismaha dowladnimada, dimuqraadiyad, iyo ammaanka dalkeeda. Dadaalladaas guuleystay ee ay hirgelisay Somaliland, waxay sababeen in dowladda Maraykanku ay mar kale dib u eegto istiraatiijiyaddeeda ku wajahan Geeska Afrika iyada oo suurto-gal tahay in muddo xileedka Madaxweyne Trump ay Somaliland hesho aqoonsi buuxa.
Fursad lagu Dhisayo Xidhiidh Ku Saleysan Qiyam Wadaag:
Dowladda Maraykanku waxa ay haystaa fursad dahabi ah oo ay ku xoojiso saameynteeda Geeska Afrika iyada oo taageeraysa Somaliland oo ah waddan si dhab ah u matalaya waxa uu Maraykanku had iyo jeer ku faano: dimuqraadiyad, xorriyad, iyo madax-bannaani.
Iskaashiga Dhaqaale iyo Maalgashiga Istiraatiijiga ah:
Marka laga gudbo iskaashiga dhanka amniga, Somaliland waxay u tahay Maraykanka fursad dhaqaale iyo horumarineed oo muhiim ah. Maalgashi lagu hago hay’adaha sida Millennium Challenge Corporation (MCC), USAID, ama Development Finance Corporation (DFC), iyada oo la beegsanayo mashaariicda kaabeyaasha dhaqaalaha, waxbarashada, isgaadhsiinta dhijitaalka ah, iyo horumarinta ganacsiyada yaryar, wuxuu ka dhigi karaa Somaliland waddan tusaale u noqda koboc loo dhan yahay oo saamayn ku yeesha Afrika.
Somaliland waxay leedahay nidaamka isticmaalka lacagaha mobilka ah oo ka mid ah kuwa ugu horumarsan Afrika, qurbojoog firfircoon, iyo haykal dhaqaale oo furfuran. Sifooyinkani waxay u dhigmaan degaan maalgashi oo ammaan ah isla markaan ah mid la isku halayn karo, lagana helayo wax-soo-saar waara.
Tallaabooyinka Diblumaasiyadeed ee la Taaban Karo:
Wakhtigan xasaasiga ah ayaa ah mid ku habboon in Mareykanku qaado tallaabooyin muuqda: furitaanka xafiis diblumaasi ah oo rasmi ah oo uu Maraykanku ku yeesho Hargeysa, dardargelinta booqashooyinka congress-ka iyo diblumaasiyiinta, iyo ka qaybgalka Somaliland ee shirarka goboleed iyo barnaamijyada caalamiga ah ee tababarka iyo horumarka.
Tallaabooyinkan waxay noqonayaan abaalmarin lagu dhiirrigelinayo dowlad-wanaagga, waxayna u dirayaan fariin cad guud ahaan Afrika: Mareykanku garab buu u yahay kuwa nabadda, dimuqraadiyadda, iyo madax-bannaanida ku taagan.
Arrin Istiraatiiji ah oo ku Dhisan Damiir:
Sida uu sheegay Joshua Meservey oo ah khabiir ka tirsan siyaasadda arrimaha dibedda ee Maraykanka, Somaliland waxay Maraykanka u tahay fursad dahabi ah oo mudan in uu ka faa’iidaysto, waxaanu yidhi "Mareykanku waa inuu ka tallaabsadaa xayndaabyadii siyaasadeed ee duugoobay marka ay fursad dhab ah u muuqato, fursad isugu jirta danaha istiraatiijiga ah ee qaranka Maraykanka iyo iyo mid ku salaysan damiirka.” La macaamilka Somaliland maaha oo kaliya fursad siyaasadeed ee saamaynta quwadaha kale, mana aha kaliya fursad lagu helo ilo dhaqaale, balse waa arrin damiir, mabda’, iyo mas’uuliyad siyaasadeed ah.
Dadka reer Somaliland waxay in ka badan soddon sanno si naf-hurnimo ah u hirgeliyaan nabad, dowladnimo iyo horumar ay si madax-bannaan u gaadheen. Taageerada la siinayaana maaha deeq, balse waa aqoonsi iyo garawsho ay mudan yihiin.
Gabagabo: Tusaale Loo Baahan Yahay
Mareykanku wuxuu haystaa fursad uu dunida ugu muujiyo sida uu u taageerayo saaxiibtinimada dhabta ah, madax-bannaanida ay ummaduhu xaqa u leeyihiin, iyo karaamada dadka doorbida dowladnimo halkii ay ka dooran lahaayeen fowdo. Xoojinta xidhiidhka Somaliland iyo Mareykanku maaha oo kaliya danta Mareykanka; waa calaamad siyaasadeed oo muujinaysa in Maraykanku dhab ahaantii garab u yahay kuwa doorbida xorriyadda halkii laga dooran lahaa qalalaase iyo xasilooni darro siyaasadeed, iyo isku-tiirsanaanta gudaha halkii laga dooran lahaa ku-tiirsanaan dibadeed.
Sidoo kale, Mareykanku wuxuu muddo dheer ku hawlanaa la tacaalidda xaalado adag oo ka taagnaa Geeska Afrika, halkaas oo ay adkaatay in lammaane lagu kalsoonaan karo laga helo. Somaliland ayaa si cad oo joogto ah u muujisay in ay tahay waddan leh xasillooni, dimuqraadiyad iyo istiraatiijiyad cad isla markaana ay tahay saaxiib lagu kalsoonaan karo, isla markaana ay tahay lammaane istiraatiiji ah oo muhiim u ah mustaqbalka gobolka iyo xasilloonida caalamka.
