hadhwanaagnews
Hargeysa (Hadhwanaagnews) – Fadhigii 79-aad ee Golaha Wasiirrada Jamhuuriyadda Somaliland ayaa maanta ka qabsoomay Qasriga Madaxtooyada, waxaana shir-guddoominayey Madaxweynaha Somaliland, Mudane Cabdiraxmaan Maxamed Cabdillaahi (Cirro), isaga oo uu wehelinayey Madaxweyne-ku-xigeenka, Mudane Maxamed Cali Aw Cabdi.
Shirka ayaa lagaga wada hadlay xaaladda amniga dalka, dhaqaalaha, maamulka hawada Somaliland, maalgelinta waxbarashada, taarikada gaadiidka dawladda, warbixinnada waxqabadka xukuumadda iyo qabyo-qoraalka Xeerka Ciidanka Asluubta. Waxa kale oo madaxweynuhu Golaha la socodsiiyey dhaqan-gelinta afar siyaasad oo hore loo ansixiyey.
1. Xaaladda Amniga Dalka
Wasiirka Arrimaha Gudaha iyo Amniga Qaranka Somaliland, Mudane Cabdalle Maxamed Carab, ayaa Golaha Wasiirrada uga xog-warramay xaaladda guud ee amniga iyo xasilloonida dalka.
Wasiirku waxa uu faahfaahiyey dadaallada lagu xoojinayo ilaalinta nabadgelyada bulshada, kala dambaynta iyo xasilloonida guud ee Somaliland.
Waxa uu sidoo kale adkeeyey muhiimadda ay leedahay wada-shaqaynta hay’adaha amniga qaranka, ilaalinta nabadgelyada shacabka iyo xoojinta doorka bulshada ee dhowrista nabadda, isaga oo tilmaamay in sugidda amnigu saldhig u tahay xasilloonida, horumarka iyo jiritaanka dawladnimada Somaliland.
2. Dhaqaalaha Dalka iyo Saamaynta Xiisadaha Bariga Dhexe
Wasiiru-dawlaha Wasaaradda Maaliyadda iyo Horumarinta Dhaqaalaha Somaliland, Mudane Ismaaciil Mawliid Cabdillaahi, ayaa Golaha uga warbixiyey xaaladda guud ee dhaqaalaha dalka, isaga oo si gaar ah u faahfaahiyey saamaynta ay xiisadaha Bariga Dhexe ku yeesheen dhaqaalaha caalamka iyo suuqyada ganacsiga dunida.
Wasiiru-dawluhu waxa uu sheegay in xiisadahaasi sababeen korodhka qiimaha shidaalka iyo maciishadaha, kharashaadka gaadiidka badda ee xamuulka iyo khidmadaha caymiska maraakiibta.
Waxa uu xusay in arrimahaasi saamayn ku yeesheen habsami-u-socodka ganacsiga caalamka, kharashaadka lagu soo dejiyo badeecadaha iyo awoodda wax-iibsiga bulshada.
Waxa kale oo uu carrabka ku adkeeyey muhiimadda ay leedahay la-socodka isbeddellada dhaqaale ee caalamka iyo qiimaynta saamayntooda gudaha Somaliland, si loo xoojiyo adkaysiga dhaqaalaha qaranka, loona ilaaliyo xasilloonida suuqyada iyo danta guud ee bulshada.
3. Wasiirka Duulista Hawada oo Ka Warbixiyey Safarkiisii Canada iyo Imaaraadka
Wasiirka Wasaaradda Duulista Hawada iyo Horumarinta Madaarrada Somaliland, Mudane Fu’aad Axmed Nuux, ayaa Golaha Wasiirrada warbixin ka siiyey safarkiisii shaqo ee Canada iyo Imaaraadka Carabta, iyo kulamadii uu la yeeshay dalalka saaxiibka la ah Somaliland iyo hay’ado kala duwan.
Kulamadaasi waxa ay la xidhiidheen dadaallada xukuumadda ee xal u helidda arrimaha maamulka hawada Somaliland, caqabadaha E-Visa iyo carqaladaha saameeya duulimaadyada rayidka ah.
Wasiirku waxa uu Golaha la wadaagay natiijooyinka kulamadii uu magaalada Montreal kula yeeshay dhinacyada muhiimka u ah doodda sharci ee Somaliland ee ku saabsan maamulka hawada. Waxa uu sidoo kale xusay muhiimadda ay Montreal u leedahay arrimaha duulista hawada, maadaama ay xarun u tahay hay’ado caalami ah oo dhinacaas ka shaqeeya.
Nidaamka BSP oo Somaliland Mamnuucday
Wasiir Fu’aad ayaa Golaha u caddeeyey in nidaamka IATA ee Billing and Settlement Plan (BSP), ee maamulka Muqdisho ku dhawaaqay, aanu khusayn Somaliland, isla markaana aan laga hirgelin doonin madaarrada dalka.
Wasaaradda Duulista Hawada ayaa 25-kii Oktoobar 2026 soo saartay amar rasmi ah oo isla markiiba dhaqan galay, kaas oo faraya shirkadaha diyaaradaha ee Somaliland ka hawlgala inaanay adeegsan nidaamka BSP.
Amarku waxa kale oo uu dhigaya inaan madaarrada Somaliland lagaga dhoofi karin tigidhada lagu soo saaray nidaamkaas, xataa haddii dibadda laga soo goostay ama ay yihiin tigidhada tegista iyo soo noqoshada.
Wasiirku waxa uu sheegay in shirkadaha diyaaradaha lagu amray inay go’aanka gaadhsiiyaan wakiilladooda iyo xarumahooda iibinta tigidhada.
Waxa uu intaa ku daray in xukuumaddu sii waddo dadaallada sharci iyo diblomaasiyadeed ee lagu xaqiijinayo xuquuqda Somaliland ee maamulka hawadeeda, iyadoo taageero iyo wada-shaqayn ka helaysa dalal saaxiib ah iyo hay’ado caalami ah.
4. Shirweynaha Qaran ee Maalgelinta Waxbarashada
Wasiirka Wasaaradda Waxbarashada, Barbaarinta iyo Sayniska Somaliland, Professor Ismaaciil Ducaale Yuusuf, ayaa Golaha Wasiirrada uga warbixiyey Shirweynaha Qaran ee Maalgelinta Waxbarashada Somaliland, kaas oo 26-kii iyo 27-kii Oktoobar 2026 lagu qabtay magaalada Hargeysa.
Shirweynaha waxa ka qaybgalay Madaxweyne-ku-xigeenka Somaliland, xubno ka tirsan Golaha Wasiirrada iyo Golaha Wakiillada, maayarrada magaalooyinka waaweyn, hay’adaha caalamiga ah, jaamacadaha dalka, ganacsatada iyo bahda waxbarashada.
Ujeeddada shirweynuhu waxay ahayd sidii loo xoojin lahaa maalgelinta waxbarashada, kor loogu qaadi lahaa tayadeeda, loona ballaadhin lahaa fursadaha ay helaan ardayda Somaliland.
Wasiirku waxa uu sheegay in shirweynaha lagu lafo-guray laguna aqoonsaday caqabadaha maaliyadeed iyo kuwa farsamo ee ay Wasaaraddu wajahdo, kuwaas oo saamayn ku leh fidinta adeegyada waxbarashada, tayayntooda iyo sinnaanta fursadaha waxbarasho.
Waxa uu Golaha la wadaagay war-murtiyeed ka kooban sagaal qodob oo laga soo saaray shirweynaha.
5. Taarikada Gaadiidka Dawladda iyo Khataraha Isticmaalka Sharci-darrada ah
Wasiirka Wasaaradda Gaadiidka iyo Horumarinta Jidadka Somaliland, Mudane Cismaan Ibraahim Nuur (Afgaab), ayaa Golaha Wasiirrada la wadaagay warbixin ku saabsan taarikada gaadiidka dawladda iyo khataraha la xidhiidha isticmaalka aan waafaqsanayn nidaamka iyo shuruucda dalka.
Wasiirku waxa uu xusay muhiimadda ay leedahay ilaalinta hantida qaranka, xaqiijinta aqoonsiga gaadiidka dawladda iyo adkaynta nidaamyada maamulka iyo daba-galka.
Waxa uu tilmaamay in arrimahaasi muhiim u yihiin ka hortagga isticmaal kasta oo sharci-darro ah oo dhaawici kara amniga, isla-xisaabtanka iyo kalsoonida lagu qabo hay’adaha dawladda.
6. Qorshaha Warbixinnada Waxqabadka Xukuumadda ee 2025 iyo 2026
Wasiirka Wasaaradda Madaxtooyada Somaliland, Mudane Khadar Xuseen Cabdi, ayaa Golaha Wasiirrada u soo bandhigay qorshaha diyaarinta iyo isku-dubbaridka warbixinta waxqabadka xukuumadda ee sannadaha 2025 iyo 2026.
Warbixintan ayaa lagu soo bandhigi doonaa waxqabadka wasaaradaha iyo hay’adaha dawladda muddada ay xukuumaddu talada dalka haysay.
Wasiirku waxa uu sharaxay qaabka loo diyaarinayo warbixinnada, si loo xaqiijiyo xog sugan, xog-ururin mideysan iyo soo bandhigid hufan oo muujinaysa waxqabadka iyo horumarka laga gaadhay qorshayaasha xukuumadda ee mudnaanta u leh qaranka.
7. Golaha Wasiirrada oo Ka Dooday Qabyo-qoraalka Xeerka Ciidanka Asluubta
Golaha Wasiirrada Somaliland ayaa dood ka yeeshay qabyo-qoraalka Xeerka Ciidanka Asluubta, isaga oo qiimayn ku sameeyey muhiimadda uu xeerkani u leeyahay dejinta qaab-dhismeed sharciyeed oo hagaya hawlaha iyo waajibaadka ciidanka.
Sida lagu sheegay warbixinta fadhiga, doodda Golaha ee qabyo-qoraalka xeerkan ayaa sii socon doonta toddobaadka dambe.
8. Madaxweyne Cirro oo Dhaqan-geliyey Afar Siyaasadood oo Qaran
Gabagabadii fadhiga 79-aad, Madaxweynaha Somaliland, Mudane Cabdiraxmaan Maxamed Cabdillaahi (Cirro), ayaa Golaha Wasiirrada la socodsiiyey in uu toddobaadkan soo saaray wareegto dhaqan-gelin ah oo ku saabsan afar siyaasad oo uu Golaha Wasiirradu hore u ansixiyey muddadii ay xukuumaddani xilka haysay.
Afarta siyaasad ayaa kala ah:
Siyaasadda Waxbarashada Qaranka
Siyaasadda Dhallinyarada
Siyaasadda Maamulka Dhulka
Siyaasadda Calafka Xoolaha
Madaxweynuhu waxa uu Golaha Wasiirrada iyo hay’adaha dawladda ee ay khusayso faray inay si dhab ah ugu dhaqmaan siyaasadaha uu Goluhu ansixiyo, isla markaana ay u beddelaan qorshe-hawleed qaran iyo waxqabad muuqda oo ay dadka iyo dalkuba ka faa’iidaystaan.
Fadhiga 79-aad ee Golaha Wasiirrada ayaa sidaas ku soo bandhigay arrimo kala duwan oo la xidhiidha amniga, dhaqaalaha, maamulka hawada, waxbarashada, ilaalinta hantida qaranka iyo qorshayaasha waxqabadka xukuumadda.
