hadhwanaagnews
Hargeysa — Wasiirka Wasaaradda Dowladaha Hoose iyo Horumarinta Magaalooyinka Somaliland, Xasan Axmed Ducaale "Macalin”, ayaa shacabka Somaliland ugu baaqay inay si weyn u taageeraan dadaallada Madaxweyne Cabdiraxmaan Maxamed Cabdillaahi (Cirro) uu ugu jiro raadinta aqoonsi caalami ah oo Somaliland hesho.
Wasiirka ayaa sheegay in safarka Madaxweynaha iyo dadaallada diblomaasiyadeed ee uu wado ay yihiin arrin uu sheegay inay khusayso qaranimada Somaliland, isaga oo bulshada ugu baaqay inay ka fogaadaan in dadaalladaas lagu saleeyo mucaaradad siyaasadeed ama aragti xisbi.
"Bulshada Somaliland waxaan leeyahay safarka Madaxweynuhu iyo ummaddan waxa u soo kordhay ba in la taageero ayay u baahan tahay. Dadaalka Madaxweynuhu ku maqan yahay mucaarad iyo hebel ku xukee halkaas lagama dayi karo, waa qaranimada lafteedii,” ayuu yidhi Wasiir Xasan Axmed Ducaale "Macalin”.
Wasiirka ayaa hadalkiisa ku adkeeyay muhiimadda ay leedahay in bulshada ay taageerto dadaallada loo arko inay ku saabsan yihiin danaha guud ee Somaliland, isaga oo safarka Madaxweynaha ku tilmaamay mid la xidhiidha arrimaha qaranimada iyo aqoonsi raadinta.
Hadalkan ayaa ku soo beegmaya xilli Madaxweyne Cirro iyo wafdi uu hoggaaminayo ay ku jiraan safar diblomaasiyadeed oo ay kaga qayb qaadanayaan kulamo iyo dadaallo la xidhiidha xiriirka Somaliland iyo beesha caalamka.
