hadhwanaagnews
Wasiirka Wasaaradda Qorshaynta iyo Horumarinta Qaranka Jamhuuriyadda Somaliland, oo uu wehelinayey Agaasimaha Guud ee Wasaaradda, ayaa xafiiskeeda ku qaabishay wefti ka socday hay’adda caalamiga ah ee Chemonics UK, kuwaas oo uu hoggaaminayey Agaasimaha Barnaamijyada hay’adda, Mudane Arran McMahon.
Kulanka ayaa diiradda lagu saaray xoojinta wada-shaqaynta ka dhaxaysa Dowladda Somaliland iyo Chemonics UK, gaar ahaan dhinacyada qorshaynta horumarinta, dhismaha awoodaha hay’adaha dowladda, kobcinta dhaqaalaha iyo taageeridda barnaamijyada horumarineed ee mudnaanta u leh qaranka.
Mudnaanta Horumarineed ee Qaranka
Wasiirka ayaa weftiga la wadaagtay mudnaanta horumarineed ee Dowladda Somaliland ee ku cad Qorshaha Horumarinta Qaranka, iyo sidoo kale yoolalka istaraatiijiyadeed ee Wasaaradda Qorshaynta.
Waxay xustay muhiimadda ay xukuumaddu siinayso iskaashiga lala yeesho hay’adaha caalamiga ah si loo taageero horumarinta dalka, kor u qaadista awoodda hay’adaha dowladda, kobcinta dhaqaalaha, maamul-wanaagga iyo fulinta mashaariicda mudnaanta leh.
Chemonics UK oo Ballanqaadday Iskaashi Dheeraad ah
Dhankooda, masuuliyiinta Chemonics UK ayaa muujiyey sida ay uga go’an tahay sii xoojinta wada-shaqaynta ay la leeyihiin Dowladda Somaliland.
Waxay adkeeyeen muhiimadda iskaashi wax-ku-ool ah oo gacan ka geysta hirgelinta barnaamijyada horumarineed, dhismaha hay’ado awood leh iyo taageeridda qorshayaasha horumarineed ee dalka.
Xoojinta Iskaashiga Horumarineed
Kulanka ayaa ku soo dhammaaday is-afgarad ku saabsan sii wadista wada-shaqaynta iyo isku dubbaridka dadaallada horumarineed ee u dhexeeya Dowladda Somaliland iyo Hay’adda Chemonics UK, si loo xaqiijiyo horumar waara iyo koboc dhaqaale oo dalka ka hirgala.
