hadhwanaagnews
Madaxweynaha Jamhuuriyadda Somaliland, Mudane Cabdiraxmaan Maxamed Cabdillaahi (Cirro), ayaa fariin adag u diray dowladda Soomaaliya, isaga oo sheegay in Somaliland diyaar u tahay difaaca dalkeeda iyo dadkeeda.
Madaxweynaha ayaa sheegay in Somaliland awood u leedahay inay iska difaacdo cid kasta oo khatar ku ah amniga iyo jiritaankeeda, isaga oo xusay in Somaliland maanta aanay ahayn dal cidlo ah.
"Somaliland waxay ku filan tahay inay dalkeeda iyo dadkeedaba difaacato. Waxaanan u sheegayaa Xasan iyo ciddii wehelisa ba, haddii aad dawlado kale noo soo kaxaysataan, Somaliland maanta keli maaha, laakiin idinka waan idinku filanahay inaanu iska kiin difaacno,” ayuu yidhi Madaxweyne Cabdiraxmaan Cirro.
Adkaynta Mawqifka Somaliland
Madaxweynuhu wuxuu hadalkiisa ku muujiyey adkaynta mowqifka Somaliland ee ku aaddan difaaca qarannimada iyo amniga dalka, isaga oo tilmaamay in shacabka iyo ciidamada Somaliland ay diyaar u yihiin ilaalinta xasilloonida iyo madax-bannaanida Somaliland.
Hadalka Madaxweynaha ayaa kusoo beegmaya xilli ay jiraan hadallo siyaasadeed iyo xiisado la xidhiidha xidhiidhka Somaliland iyo Soomaaliya.
Xaaladda Gobolka
Madaxweyne Cabdiraxmaan Cirro ayaa sidoo kale tilmaamay in Somaliland ay maanta leedahay xidhiidho iyo iskaashi caalami ah oo ka duwan sidii hore, taas oo uu sheegay inay sare u qaadayso awoodda iyo kalsoonida Somaliland ee gobolka.
Hadalkan ayaa si weyn loogu falanqeynayaa saaxadda siyaasadda Geeska Afrika, iyadoo uu imanayo xilli gobolka ay ka jiraan loollan siyaasadeed iyo isbeddello dhinaca amniga iyo diblomaasiyadda ah.
