hadhwanaagnews
Madaxweynaha Jamhuuriyadda Somaliland, Mudane Cabdiraxmaan Maxamed Cabdillaahi (Cirro) ayaa shalay wareegto Madaxweyne oo summadeedu tahay JSL/XM/G/083-071/042025 ku magacaabey Guddida Qaran ee isku-dubaridka iyo Qaban-qaabada Xuska maalinta qaran ee 18-ka May 2025.
Guddidan uu madaxweynaha JSL, magacaabey ayaa ka kooban sagaal xubnood, kuwaas oo uu u xilsaaray qaban-qaabada xuska maalinta Qarannimada Jamhuuriyadda Somaliland ee 18-ka May, wareegtadan madaxweynuhu ku magacaabay xubnahan oo soo gaadhay Wargeyska Dawan ayaa u dhigneyd sidan:-
"Ujeedo : Magacaabista Guddida Qaran ee agaasinka iyo qabanqaabada xuska maalinta Qarannimada ee 18-ka May.
Markii aan tixgeliyey
Muhiimadda maalinta Qaran ee 18-ka May u leedahay shacabka Jamhuuriyadda Somaliland, iyo doorka ay maalintaasi ku leedahay xoojinta midnimada, madax-bannaanida, iyo sumcadda caalamiga ah ee Qaranka Jamhuuriyadda Somaliland.
Markii aan arkay
In sannadkan 2025-ka uu yahay sannadkii ugu horreeyey ee ay Xukuumadda WADAJIR iyo WAXQABAD xilka hayso, isla markaana loo baahan yahay fursaddan in si heer qaran ah loo abaabulo si loo muujiyo heerka horumarka iyo koboca Qaranka Jamhuuriyadda Somaliland.
Markii aan qiimeeyey
Baahida loo qabo in si xirfad leh, abaabulan, oo wadajir ah loo agaasimo looguna diyaar garoobo xuska 18-ka May, isla markaana la sameeyo hannaan isku dubbaridan oo ay qayb ka yihiin dhammaan heerarka dawladda iyo qaybaha kala duwan ee bulshada reer Somaliland ee ku nool gudaha dalka iyo dibeddiisaba.
Markii ay ii muuqaatay
In loo baahan yahay Guddi Qaran oo si toos ah ugu xilsaaran Agaasinka iyo Qabanqaabada Xuska 18-ka May 2025, iyo in wada shaqaynta heer Qaran ay muhiim u tahay guusha munaasabaddan.
Waxa aan mas’uuliyiintan hoos ku xusan u magacaabayaa in ay noqdaan Guddiga Qaran ee Agaasinka iyo Qabanqaabada Xuska 18-ka May 2025, oo ka kooban sidatan:-
Wasiirka Wasaaradda Arrimaha Gudaha iyo Amniga – Guddoomiye
Wasiirka Wasaaradda Warfaafinta, Dhaqanka iyo Wacyigelinta – G/Kuxigeen
Wasiirka Wasaaradda Madaxtooyada Jamhuuriyadda Somaliland- Xoghaye
Wasiirka Wasaaradda Waxbarashada, Barbaarinta iyo Sayniska – Xubin
Wasiirka Wasaaradda Duulista, Hawada iyo Horumarinta Madaarada – Xubin
Wasiirka Wasaaradda Shaqada, Arrimaha Bulshada iyo Qoyska – Xubin
Wasiirka Wasaaradda Horumarinta Maalgashiga iyo Wershadaha- Xubin
Guddoomiyaha Gobolka Maroodijeex – Xubin
Duqa Caasimadda Hargeysa – Xubin
Gaba-gabadii madaxweynaha Jamhuuriyadda Somaliland, Mudane Cabdiraxmaan Maxamed Cabdillaahi Cirro, waxa uu faray inay xil weyn iska saaraan isku-dubaridka iyo qaban-qaabada xuska maalinta Qarannimada.
Sidaas darteed, waxaa la farayaa in mas’uuliyiintan ay xil gaar ah iska saaraan agaasinka iyo qabanqaabada xuska 18-ka May, sidoo kale waxaan farayaa dhammaan maamullada gobollada, degmooyinka, hay’adaha dawladda, iyo cid kasta oo ay khusayso in ay si buuxda ula shaqeeyaan guddigan, kana qayb qaataan qabanqaabada maalinta qaran ee 18-ka May si waafaqsan qorshaha iyo jihada uu dejiyo guddigu.
