Kulankan ayaa daba socday ballanqaadyadii ka soo baxay Shirweynihii Kobcinta
Hargeysa (Hadhwanaagnews) – Guddida Sare ee Siyaasadda Hay’adda Caymiska Qaranka Somaliland ayaa xalay, 29-ka Oktoobar 2026, yeeshay kulankoodii caadiga ahaa, kaas oo diiradda lagu saaray qorshe-hawleedka muddada dhow ee hirgelinta caymiska gaadiidka ee la waajibiyey, kaas oo dhaqangelaya 1-da Jeenaweri 2027, iyo wada-tashiga qabyo-qoraalka Siyaasadda Caymiska Qaranka (Somaliland National Insurance Policy).
Kulankan ayaa daba socday ballanqaadyadii ka soo baxay Shirweynihii Kobcinta Suuqa Caymiska ee Hargeysa ka qabsoomay 12–13 Oktoobar 2026. Waxa shir-guddoominayey Guddoomiyaha Guddida Sare, ahna Wasiirka Wasaaradda Maaliyadda iyo Horumarinta Dhaqaalaha, Mudane Cabdillaahi Xasan Aadan.
Wasiirku waxa uu adkeeyey in hirgelinta caymisku u baahan tahay hawl joogto ah, qorshe cad iyo isla-xisaabtan, si loo taageero kobcinta dhaqaalaha dalka, taas oo ah mudnaanta koowaad ee Madaxweynaha Jamhuuriyadda Somaliland, Mudane Dr. Cabdiraxmaan Maxamed Cabdillaahi ‘Cirro’.
Waxa uu tilmaamay in caymisku yahay tiir muhiim u ah ilaalinta hantida iyo yaraynta culaysyada maaliyadeed ee khasaaruhu ku keeno qofka, qoyska, ganacsiga iyo qaranka.
Dhankiisa, Guddoomiyaha Hay’adda Caymiska Qaranka JSL, Mudane Axmed Xirsi Ducaale, ayaa xusay in caymis lagu kalsoon yahay uu ka bilaabmayo hay’ad awood u leh gudashada waajibaadkeeda. Waxa uu mudnaanta siiyey xoojinta qaab-dhismeedka iyo maamulka gudaha, caddaynta masuuliyadaha waaxyaha iyo xafiisyada, tayeynta habraacyada shaqada iyo kobcinta aqoonta shaqaalaha.
Waxa kale oo uu sheegay in shirweynihii dhawaan la qabtay, oo ay ka soo qayb galeen wufuud ka kala socotay 12 dal, uu dareenka caalamka ku soo jeediyey suuqa caymiska Somaliland ee curdinka ah, isla markaana uu abuuray fursado iskaashi, maalgashi iyo is-weydaarsi aqooneed.
Guddoomiyuhu waxa uu intaas ku daray in natiijooyinka shirweynuhu taageerayaan waajibaadka Hay’adda ee kobcinta suuq caymis oo hufan, lagu kalsoon yahay, shareecada iyo shuruucda dalka waafaqsan.
Qodobada kulanka mudnaanta la siiyey
Kulanka ayaa si gaar ah diiradda loogu saaray qodobadan:
Dhammaystirka siyaasadaha iyo xeerarka: Qabyo-tirka Siyaasadda Caymiska Qaranka iyo xeer-nidaamiyeyaasha hagaya suuqa caymiska.
Isku-duwidda daneeyeyaasha: Dhammaystirka Qorshaha Wada-shaqaynta Daneeyeyaasha Caymiska Qaranka, oo ay ku jiraan wasaaradaha iyo hay’adaha dawladda.
U-hoggaansanaanta iyo fulinta: Dejinta habraacyo cad oo xaqiijinaya fulinta waajibaadka sharciga ah iyo u-hoggaansanaan ballaadhan.
Caymiska gaadiidka dawladda: Diyaarinta qorshe qeexaya tallaabooyinka hirgelinta iyo masuuliyadaha hay’adaha ay khusayso.
Tayeynta shaqaalaha iyo xoojinta kormeerka: Bixinta tababarro xirfadeed oo leh shahaadooyin la aqoonsan yahay iyo xoojinta awoodda korjoogtaynta suuqa.
La-xisaabtanka shirkadaha: Hubinta in shirkadaha caymisku buuxiyaan shuruudaha xeerarka iyo waajibaadkooda sharciyeed.
Ilaalinta macaamiisha: Dhisidda nidaam ilaaliya xuquuqda macaamiisha, qaabila cabashooyinka, taageerana xalinta khilaafaadka caymiska.
Daadejinta adeegyada Hay’adda: Gaadhsiinta adeegyada dhammaan gobollada JSL, si loo fududeeyo helitaankooda loona taageero hirgelinta caymiska dalka oo dhan.
Wacyigelin dadweyne iyo diyaar-garowga dhaqangelinta
Guddidu waxay sidoo kale xoojiyeen in hawlahan shaqo ay barbar socdaan barnaamij wacyigelin iyo waxbarasho dadweyne oo muddo dhow, dhexe iyo fog ah, kaas oo lagu hagayo Hannaanka Qaran ee Wacyigelinta, Waxbarashada iyo Dhisidda Kalsoonida Macaamiisha Caymiska 2026–2030 (Somaliland National Insurance Awareness, Education and Consumer Trust Framework 2026–2030) oo ay Hay’addu dhowaan diyaarisay.
Ujeeddada barnaamijkan ayaa ah in bulshadu fahamto caymiska, hesho xog cad, isla markaana ay kalsooni ku qabto adeegyada iyo habraacyada ilaalinaya xuquuqdeeda.
Iyadoo loo gudbayo marxaladda dhaqangelinta, Guddidu waxay dib-u-habayn ku samaysay jadwalkeeda shaqo, si loo xoojiyo dabagalka hawlaha mudnaanta leh loona dedejiyo go’aamada lagama maarmaanka u ah hirgelinta.
Tallaabadani waxay adkaynaysaa in diyaar-garowga caymiska loo wado hannaan qorshaysan, isku xidhan oo ku salaysan natiijooyin la cabbiri karo.
hadhwanaagnews 
