hadhwanaagnews
Fadhigii taariikhiga ahaa ee Golaha Guurtida Jamhuuriyadda Somaliland ee maanta lagu ansixiyey iscasilaadda Guddoomiyihii Golaha, Mudane Saleebaan Maxamuud Aadan, ayaa waxaa ka dhex muuqday afar mudane oo aan ku biirin codkii aqlabiyadda Golaha.
Iscasilaadda Guddoomiye Saleebaan ayaa waxaa oggolaaday 69 mudane, halka laba mudane ay diideen, laba kalena ay ka aamuseen. Afarta mudane ee ka duwanaaday aragtida aqlabiyadda ayaa kala ahaa Xildhibaan Cabdiraxmaan Cismaan Xasan (Shaadh), Xildhibaan Khadar Ismaaciil Qardhab, Xildhibaan Cumar Mukhtaar Ciise (Xamari) iyo Xildhibaan Mabduux Cismaan Sheekh Xasan.
Mawqifka ay qaateen afartan mudane ayaa si weyn u soo jiitay dareenka xubnihii Golaha iyo dadkii la socday fadhiga, iyadoo qaar badan ay ku macneeyeen inuu ka tarjumayo ixtiraam iyo xidhiidh shaqo oo muddo dheer ka dhexeeyey Guddoomiyihii hore iyo mudanayaasha Golaha.
Fadhiga maanta ayaa lagu soo afjaray hoggaankii 22-ka sano socday ee Saleebaan Maxamuud Aadan, waxaana isla maalintaas Golaha Guurtidu doortay guddoomiye cusub oo hoggaamin doona Golaha muddada soo socota.
