hadhwanaagnews
Qiimaha shidaalka dunida ayaa mar kale sare u kacay, iyadoo saliidda cayriin ee Brent ay gaadhay inta u dhaxaysa $76 illaa $77 halkii foosto, kadib xiisadda sii xoogaysanaysa ee u dhexaysa Maraykanka iyo Iiraan.
Korodhkan ayaa la xidhiidha walaaca laga qabo amniga marinka Hormuz, oo ah marin-biyoodka ay maraan ku dhowaad shan meelood meel (20%) shidaalka dunida loo dhoofiyo. Xiisadaha milatari ee ka taagan gobolka ayaa sare u qaaday cabsi laga qabo in hakad ku yimaaddo isu socodka maraakiibta shidaalka.
Wararka ayaa sidoo kale sheegaya in Qatar ay cambaaraysay weerarro lala xidhiidhiyey Iiraan oo lagu bartilmaameedsaday maraakiib marayey Gacanka Hormuz, halka Maraykankuna uu shaaciyey inuu qaaday weerar uu ku tilmaamay jawaab ka dhan ah falalkaasi.
Khubarada dhaqaalaha ayaa sheegaya in haddii xiisadda gobolka sii korodho, ay suurtogal tahay in qiimaha shidaalka caalamku uu sii kordho maalmaha soo socda, taas oo saamayn ku yeelan karta suuqyada tamarta iyo dhaqaalaha dunida.
