hadhwanaagnews
Agaasimaha Guud ee Wasaaradda Arrimaha Dibadda iyo
Iskaashiga Caalamiga ah ee Jamhuuriyadda Somaliland, Maxamed Cabdiraxmaan
Xasan, ayaa farriin ku aaddan xuska 18-ka May u diray qurba-joogta Somaliland
ee ku nool daafaha dunida.
Agaasimaha Guud ayaa ugu baaqay qurba-joogta inay si wadajir
ah, midnimo iyo waddaniyad ku dheehan tahay ugu diyaar garoobaan munaasabadda
xuska 18-ka May, isla markaana si weyn u muujiyaan taageerada ay u hayaan
qadiyadda Jamhuuriyadda Somaliland.
Waxa uu ku adkeeyey qurba-joogta inay muujiyaan shucuurtooda
waddaniyadeed, kana shaqeeyaan sidii codka iyo jiritaanka Somaliland uga dhex
muuqan lahaa bulshooyinka ay la nool yihiin iyo fagaarayaasha caalamiga ah.
Sidoo kale, Agaasimaha Guud ayaa si gaar ah ugu mahadceliyey
guddiyada jaaliyadaha iyo dhammaan qurba-joogta Somaliland kaalinta firfircoon
ee ay ku leeyihiin horumarka dalka, taageerada joogtada ah iyo ka
qayb-qaadashada dadaallada aqoonsi raadinta Jamhuuriyadda Somaliland.
