hadhwanaagnews
Wasaaradda Tamarta iyo Macdanta Somaliland ayaa martigelisay booqasho aqoon korodhsi ah oo ay ku tageen arday ka socday Kuliyadda Dawladnimada iyo Maamulka Dadweynaha ee Jaamacadda Gollis, taas oo qayb ka ahayd dadaallada lagu xoojinayo isku xidhka waxbarashada iyo hay’adaha dowladda.
Ardayda ayaa kulan la yeeshay masuuliyiinta Wasaaradda, kuwaas oo si faahfaahsan uga warbixiyay shaqada Wasaaradda iyo doorka ay ku leedahay horumarinta khayraadka dabiiciga ah ee Somaliland.
Masuuliyiinta ayaa ardayda la wadaagay:
habka loo dejiyo siyaasadaha Tamarta, Macdanta iyo Batroolka,
qorshaynta istiraatiijiga ah ee Wasaaradda,
maamulka iyo ilaalinta khayraadka dabiiciga ah,
iyo muhiimadda ay waaxdani u leedahay koboca dhaqaalaha dalka.
Kulanka ayaa sidoo kale diiradda lagu saaray sidii dhalinyarada aqoonyahanka ahi uga qayb qaadan lahaayeen horumarinta iyo maamulka khayraadka dalka mustaqbalka.
Booqashadan aqoon korodhsiga ah ayaa ardayda siisay fahan dhab ah oo ku saabsan shaqada dowladda iyo habka ay hay’adaha qaranku u shaqeeyaan, iyadoo sidoo kale kor u qaaday wada-shaqaynta iyo is-weydaarsiga aqoonta ee u dhexeeya Wasaaradda Tamarta iyo Jaamacadda Gollis.
Ardayda ayaa ugu dambayn uga mahadceliyay Wasaaradda sida wanaagsan ee loo soo dhaweeyay iyo aqoonta qiimaha leh ee ay ka faa’iideen booqashada, iyaga oo ku tilmaamay mid muhiim u ah mustaqbalkooda waxbarasho iyo waayo-aragnimada shaqo ee ay heli doonaan.
