HADHWANAAGNEWS
Taliyaha Ciidanka Booliska ee Somaliland, Cabdiraxmaan Cabdilaahi Xasan, ayaa kormeer xaqiiqo-raadis ah ku tagay Suuqa Waaheen ee magaalada Hargeisa.
Kormeerkan ayaa ku soo beegmay xilli ay bulshada iyo ganacsatadu si weyn ugu mashquulsan yihiin wax iibsiga iyo iibinta adeegyada ciidda bisha barakaysan ee Ramadaan.
Ammaanka Suuqa oo La Adkaynayo
Taliyaha ayaa intii uu kormeerka ku jiray bogaadiyey ciidamada booliska ee ka shaqaynaya sugidda amniga suuqa iyo bulshada ganacsatada ah ee halkaas ku dhaqan. Wuxuu sidoo kale xusay muhiimadda ay leedahay in bulshada iyo ciidamada ammaanku si wadajir ah u ilaaliyaan nabadda.
Wuxuu sheegay in uu bulshada u sida salaan iyo duco uga timid Madaxweynaha Somaliland, isaga oo ku boorriyey inay sii xoojiyaan wada shaqaynta lagu ilaalinayo amniga.
Booliska oo Ah Adeeg Shacabka u Shaqeeya
Taliyaha Booliska Somaliland wuxuu carrabka ku adkeeyey in ciidanka boolisku yahay adeeg u shaqeeya shacabka, isla markaana ay muhiim tahay in bulshada iyo hay’adaha amnigu iska kaashadaan ilaalinta xasilloonida dalka.
Wuxuu yidhi:
"Madaxweynaha Qaranka JSL waxa aanu idiinka sidnaa duco iyo in aynu wada ilaashano amniga. Dhammaanteen waynu is garabsaneynaa oo isku tiirsanahay. Boolisku waa shaqaalaha dadweynaha, idinka ayaanu idiin shaqaynaynaa.”
Ugu dambayn, taliyuhu wuxuu u mahadceliyey shacabka Somaliland sida ay ula shaqeeyaan ciidamada booliska, isaga oo Alle ka baryey in amniga dalka la sii adkeeyo.
