HADHWANAAGNEWS
Hay’adda Caymiska Qaranka Jamhuuriyadda Somaliland ayaa kulan farsamo la yeelatay Hay’adda TradeMark Africa, kaas oo diiradda lagu saaray xoojinta iskaashi istaraatiiji ah oo lagu horumarinayo adeegyada caymiska ee taageera ganacsiga iyo marin-ganacsiyeedka Berbera Corridor.
Kulanka oo uu guddoominayey Guddoomiyaha Hay’adda Caymiska Qaranka Mudane Axmed Xirsi Ducaale ayaa si qoto dheer loogu falanqeeyey doorka caymisku ku leeyahay yareynta khataraha ganacsiga, gaar ahaan kuwa la xidhiidha gaadiidka, badeecadaha iyo dhaqdhaqaaqa ganacsi ee isaga goosha dalalka gobolka.
Dhanka TradeMark Africa waxaa kulanka ka qayb galay Sharmaake Cabdi Jaamac, Madaxa Hay’adda ee Somaliland, iyo Cabdiraxmaan Cabdillaahi, kuwaas oo carrabka ku adkeeyey in hirgelinta nidaam caymis oo wax-ku-ool ahi ay muhiim u tahay:
ilaalinta badeecadaha iyo gaadiidka ganacsiga
xoojinta kalsoonida ganacsatada iyo maalgashadayaasha
yareynta khataraha safarrada ganacsi ee isaga goosha dalalka
Sidoo kale kulanka waxaa lagu falanqeeyey muhiimadda ay leedahay in la horumariyo adeegyada caymiska ee taageera isticmaalka Dekedda Berbera iyo Berbera Corridor, si loo kordhiyo ganacsiga xuduudaha ka gudba iyo gaadiidka qaada xamuulka transit-ka ah.
Ugu dambayn, labada dhinac ayaa isla gartay in la sii xoojiyo iskaashiga mustaqbalka, si loo horumariyo adeegyada taageera ganacsiga, loona kobciyo doorka caymisku ku leeyahay horumarinta dhaqaalaha iyo fududeynta ganacsiga ee Jamhuuriyadda Somaliland.
