HADHWANAAGNEWS
Laasgeel – Maareeyaha Hay’adda Dekedaha Somaliland, Mudane Cali Diiriye Axmed, ayaa si rasmi ah u furay tartanka ciyaaraha Koobka Ramadaanta ee ka socda degmada Laasgeel.
Munaasibadda furitaanka ayaa waxa ka soo qayb galay wasiiro, agaasimeyaal wasaaradeed, maamulka degmada, iyo tiro badan oo dhallinyaro ah oo xiisaynayay tartanka.
Ciyaaraha oo Lagu Xoojinayo Caafimaadka iyo Isdhexgalka
Maareeyaha ayaa sheegay in ciyaaruhu door muhiim ah ka qaataan caafimaadka dhallinyarada, kobcinta isdhexgalka bulshada, iyo ka mashquulinta dhalinyarada waxyaabaha aan faa’iidada lahayn.
"Ciyaaruhu waxay muhiim u yihiin caafimaadka dhallinyarada iyo is dhexgalka bulshada. Waxyaabo badan oo dhallinyaradu kaga mashquuli lahaayeen ayay kaga jeesanayaan. Haddii awoodda kugu jirta aanad naftaada gelin, wax kale ayaad ku mashquuli lahayd,” ayuu yidhi Cali Diiriye Axmed.
Waxa uu sidoo kale ku booriyay dhallinyarada reer Laasgeel in tartanku ku dhammaado jawi ixtiraam, kala dambayn iyo is-qaddarin leh.
Bogaadin loo Jeediyay Guddida Abaabulka
Maareeyaha ayaa si gaar ah u ammaanay guddida dhallinyarada ee soo abaabushay barnaamijka, gaar ahaan Aadan iyo Cali, iyo sidoo kale kooxda xidhiidhka ciyaaraha ee degmada iyo gobolka oo kaalin weyn ka qaatay hirgelinta tartanka.
"Waan ku ammaanayaa guddida dhallinyarada ah ee barnaamijkan ka soo shaqeeyay, ee ay ugu horreeyeen Aadan iyo Cali, iyo kooxda xidhiidhka ciyaaraha ee degmada iyo gobolkaba oo dhab ahaantii kaalin weyn ka qaatay in barnaamijkani qabsoomo,” ayuu raaciyay.
Tartanka Koobka Ramadaanta ayaa la filayaa inuu noqdo mid xoojiya wadajirka bulshada isla markaana dhiirrigeliya horumarinta ciyaaraha heer degmo iyo heer gobolba.
