HADHWANAAGNEWS
Hargeysa – Wasiirka Wasaaradda Macdanta iyo Tamarta Somaliland, Eng. Axmed Jaamac Barre, ayaa shaaciyay in xukuumaddu heshiis la gashay shirkad caalami ah oo laga leeyahay dalka Canada, taas oo hirgelisay nidaam online ah oo casri ah oo lagu fududeynayo dalbashada ruqsadaha maalgashiga macdanta.
Wasiirka ayaa sheegay in nidaamkan cusub uu u oggolaanayo maalgashadayaasha gudaha iyo dibaddaba inay si toos ah, meel kasta oo ay joogaan, uga dalban karaan ruqsadaha macdanta iyaga oo adeegsanaya hab online ah, taas oo meesha ka saaraysa caqabado badan oo hore u jiray.
Tallaabo Casriyayneed oo Markii Ugu Horreysay ah
Eng. Axmed Jaamac Barre ayaa tilmaamay in tani ay tahay markii ugu horreysay ee Xukuumadda Somaliland ay heshiis noocan oo kale ah la gasho shirkad caalami ah, taas oo ka dhigan horumar ku wajahan daahfurnaanta, hufnaanta iyo soo jiidashada maalgashiga shisheeye.
"Waxaannu heshiis la galnay shirkad laga leeyahay Canada oo samaysay nidaam fududeynaya in maalgashadayaasha macdantu hab online ah ugu soo dalban karaan ruqsadooda dalka, meel kasta oo ay joogaanba,” ayuu yidhi Wasiirku.
Fududeynta Maalgashiga iyo Isku Xidhka Caalamiga ah
Nidaamkan cusub ayaa la filayaa inuu sare u qaado kalsoonida maalgashadayaasha, isla markaana uu dedejiyo habraacyada dalbashada iyo bixinta ruqsadaha. Sidoo kale, waxa uu ka qayb qaadanayaa in Somaliland la jaanqaaddo nidaamyada caalamiga ah ee maamulka macdanta iyo tamarta.
Tallaabadan ayaa qayb ka ah dadaallada xukuumadda ee lagu horumarinayo ka faa’iidaysiga khayraadka dabiiciga ah, isla markaana lagu abuurayo jawi maalgashi oo casri ah oo la tartami kara suuqyada kale ee gobolka iyo caalamka.
