Ka qaybgalka  Somaliland ee Shirka labaad ee Isbeddelka Cimilada Afrika, oo lagu qabtay magaalada Addis Ababa ee xarubta dalka Itoobiya, waa tallaabo muhiim ah oo muujinaysa sida xukuumadda Somaliland ay uga go’an tahay in ay door muuqda ku yeelato arrimaha deegaanka iyo cimilada ee heerka caalami. Wasaaradda Deegaanka iyo Isbeddelka Cimilada ee JSL ayaa si karti leh u matalaysa danaha qaran ee la xidhiidha ilaalinta deegaanka, u adkaysiga isbeddelka cimilada, iyo helista fursado caalami ah oo lagu taageerayo horumarka waara.

Afrika waa qaarad leh kayd dabiici ah oo aan la qiyaasi karin, laga bilaabo kaymaha ilaa biyaha hoose ee xeebaha, balse haddana sidoo kale waa tan ugu nugul saamaynta taban ee isbeddelka cimilada. Abaaraha, daadadka, kuleylka xad-dhaafka ah, iyo yaraanta biyaha, taas oo ah mid sii xoojiyay nuglaanta dhaqaale iyo bulsho ee dalal badan.

Ka qaybgalka Somaliland ee shirkani wuxuu lamid yahay in codka ummadda Somaliland laga maqlo fagaarayaasha caalamiga ah. Waxaa la filayaa in madaxda ka socota Wasaaradda Deegaanka ay si cad uga hadlaan duruufaha deegaanka ee Somaliland, iyagoo raadinaya: Iskaashi iyo maalgelin si wax looga qabto saamaynta isbedelka cimilida, abaaraha, iyo maaraynta kheyraadka dabiiciga ah. Taageero farsamo iyo aqoon-dhis, gaar ahaan la-talin ku saabsan siyaasadaha cimilada. Ka qaybgal muuqda oo Somaliland yeelato shirarka iyo heshiisyada caalamiga ah ee deegaanka.

Tani waxay fursad u tahay Somaliland si ay u horumarisato xidhiidhka ay la leedahay hay’adaha deegaanka ee caalamka, iyada oo Jamhuuriyadda Somaliland ay muddooyinkii u dambeeyay saamayn weyn ku ahayd ka qaybgalka fagaarashaasha caalamiga ah ee lagaga hadlayo arrimaha deegaanka, isla markaana ay si joogto ah qayb uga noqotay ka qaybgalka qorshayaasha maaraynta cimilada Afrika iyo dunida.

Wasaaradda Deegaanka iyo Isbeddelka Cimilada JSL waxay horey u wadday dadaallo lagu tayaynayo siyaasadaha deegaanka, iyadoo sare u qaaday wacyi-gelinta bulshada ee la xidhiidha ilaalinta dhirta, la dagaallanka xaalufka, iyo dhiirrigelinta tamarta nadiifta ah. Ka qaybgalka shirkan wuxuu u sii xoojinayaa dadaalkaas, isaga oo Somaliland u furaya albaabyo cusub oo taageero, aqoonsi iyo is-dhexgal ah.

Ka qaybgalka Somaliland ee Shirka Labaad ee Isbeddelka Cimilada Afrika maaha oo kaliya is-dhexgal caalami ah, balse waxay muujinaysaa in xukuumadda Somaliland xoojiysay isla markaana ay kor u qaadaday fahamka caalamiga ah ee xuquuqda Somaliland u leedahay ka-qaybgalka madalaha lagu jaangoynayo xalka caalamiga ah ee deegaanka. Waa farriin ah in Somaliland diyaar u tahay inay mas’uuliyad ka qaadato daryeelka deegaanka. Waxay sidoo kale tusaale u tahay hogaaminta waxtarka leh ee ay dowladdu ku muujinayso arrimaha cimilada, iyadoo codka deegaanka Somaliland u qaaday madal caalami ah.

Dunida maanta, dowladnimo masuul ah waxay ka bilaabataa ilaalinta deegaanka. Somaliland-na, talaabadan, waxay mar kale ku muujisay inay diyaar u tahay hoggaan waara.