hadhwanaagnews
Sanadaha soo socda, Somaliland waxay u muuqataa mid ku sii dhawaanaysa koboc dhaqaale oo ballaadhan, iyadoo suurtagal ay tahay inay noqoto dal malaayiin dollar soo jiita.
Warbaahinta caalamka iyo siyaasiinta adduunku waxay si weyn u falanqeynayaan arrimaha Somaliland, taasoo muujinaysa sida magaceedu ugu sii xoogeysanayo goobaha go’aamada waaweyn lagu gaadho waa aduunkee.
Dood adag ayaa ka dhaxaysa Somaliland iyo wadamo badan oo caalamka ah, taasoo salka ku haysa aqoonsiga rasmiga ah ee ay raadinayso.
Si kastaba ha ahaatee, Somaliland waxay horey u muujisay in ay tahay dal leh xasillooni, horumar dhaqaale iyo fursado ganacsi oo soo jiidan kara dalal waa weyn oo doonaya inay maal gashadaan.
Maxaa Somaliland u sahlaya inay noqoto dal koboc dhaqaale sameeya?
1. Aqoonsi Raadinta iyo Taageerada Caalamiga ah
Somaliland waxay muddo dheer u halgamaysay in la aqoonsado, waxaana muuqata in hadda ay hayso fursad aad u weyn. Haddii ay hesho aqoonsi rasmi ah, waxaa si toos ah uga faa’iidaysan doona dhaqaalaha, maalgashiga shisheeye iyo iskaashi caalami ah.
2. Xasilloonida Siyaasadeed iyo Amniga
Marka loo eego dalalka deriska la ah, Somaliland waa mid ka mid ah meelaha ugu nabdoon uguna xasilloon Geeska Afrika. Xasilloonidaasi waa furaha horumarka dhaqaale iyo maalgashiga, maadaama shirkadaha iyo dalalka maalgelinaya ay doorbidaan deegaan nabdoon.
3. Horumarka Kaabayaasha Dhaqaalaha
Maalgashiga lagu sameeyay dekedda Berbera oo ay Shirkadda DP World hormarin ku samaysay, wuxuu Somaliland u furay fursado ganacsi oo caalami ah. Haddii la ballaadhiyo kaabayaasha dhaqaalaha sida jidadka, tareenada, garoomada diyaaradaha iyo warshadaha, Somaliland waxay noqon kartaa xarun ganacsi oo muhiim ah.
4. Khayraadka Dabiiciga ah.
Somaliland waxay hodan ku tahay kheyraad dabiici ah sida shidaalka, macdanta, kalluumaysiga iyo dhulka ku habboon wax soo saarka beeraha iyo xoolaha. Haddii si wanaagsan loo maalgaliyo, kheyraadkan wuxuu noqon karaa mid dhaqaale aad u weyn usoo jiida dalka.
5. Istaraatiijiyadda Juquraafiyeed
Iyada oo ku taalla marin ganacsi oo muhiim ah, Somaliland waxay yeelan kartaa doorkeedii ganacsi ee gobolka, iyadoo noqoneysa xarun ay shirkado waaweyn u soo guuraan si ay uga faa’iidaystaan suuqyada Bariga Afrika iyo Carabta.
Abdisamed Giirre
