Casharku waa mid ina xusuusinaya in farxaddu aanay ku xidhnayn
Sawirka carruurta yaryar ee ku ciyaaraya garaan-garta ama taayirka duugga ah waxa uu xambaarsan yahay cashar nololeed oo weyn.
Carruurtaasi waxay haystaan taayir duug ah, balse qalbiyadooda waxaa ka buuxa farxad, qosol iyo qanacsanaan. Waxa laga yaabaa in qof weyn uu taayirkaas u arko qashin aan wax qiimo ah lahayn, laakiin carruurtaasi waxay u arkaan adduun ay ku madadaashaan, kuna helaan farxad.
Casharku waa mid ina xusuusinaya in farxaddu aanay ku xidhnayn lacag badan, hanti badan ama inaad hesho wax kasta oo aad doonayso. Mararka qaarkood, waxa aad haysato ayaa ku filan farxad aad u weyn, haddii aad barato sida loo qiimeeyo.
Ha odhan mar kasta: "Markaan lacag helo ayaan farxi doonaa, markaan guulaysto ayaan nolosha ku raaxaysan doonaa, ama markaan wax walba helo ayuu qalbigaygu degi doonaa.”
Ha sugin mustaqbal aanad hubin si aad ugu raaxaysato nolosha maanta. Ku farax waxa aad haysato, ku mahadnaq nimcooyinka Alle ku siiyey, hana ku mashquulin waxyaabaha kaa maqan ilaa aad illowdo nimcooyinka kuu yaalla.
Noloshu ma aha inaad wax walba haysato, balse waa inaad garato qiimaha waxa aad haysato.
Alle SWT wuxuu Qur’aanka Kariimka ah ku yidhi:
﴿وَابْتَغِ فِيمَا آتَاكَ اللَّهُ الدَّارَ الْآخِرَةَ وَلَا تَنْسَ نَصِيبَكَ مِنَ الدُّنْيَا﴾
Macnaha guud: Ku raadso waxa Alle ku siiyey hoyga Aakhiro, hana illoobin qaybtaada adduunka.
Gunaanad: Farxadda dhabta ahi mar walba kuma jirto inaad hesho wax cusub, balse waxay ku jirtaa inaad qiimayso nimcooyinka aad maanta haysato. Ku mahadnaq waxa aad haysato, kuna dadaal waxa aad hiigsanayso.
hadhwanaagnews 
