Baro inaad qaar ka mid ah qorshayaashaada, farxadahaaga iyo guulahaaga
Noloshaada gaarka ahi waxay leedahay qiimo ka weyn inta aad dadka tusayso. Qofku marka uu barto inuu ilaashado noloshiisa gaarka ah, waxa uu fahmaa in farxadda dhabta ahi aanay mar walba u baahnayn sacab, ammaan iyo indhaha dadka.
Waxaa jira guulo si aamusan lagu gaadho, farxad aan sawir laga qaadin, jacayl aan la shaacin iyo nimcooyin Alle ku siiyey oo aan cid kale ogayn.
Ha ku mashquulin inaad dadka tusto inaad faraxsan tahay, balse ku dadaal inaad dhab ahaan u faraxsanaato. Ma aha wax kasta oo noloshaada ka dhaca in la wada ogaado, mana aha guul kasta in baraha bulshada lagu soo bandhigo.
Baro inaad qaar ka mid ah qorshayaashaada, farxadahaaga iyo guulahaaga naftaada u gaar yeelato. Mararka qaarkood, aamusnaantu waxay kuu ilaalisaa deganaanshaha qalbiga, waxayna kaa fogaysaa cadaadiska ah inaad mar kasta dadka kale wax u muujiso.
Si gaar ah u noolow, si aamusan u kobac, guulahaagana ku raaxayso. Deganaanshaha qalbigaagu ha kuu noqdo markhaatiga farxaddaada.
Xusuusnow, nolosha quruxdeedu kuma jirto inta qof ee ku aragta, balse waxay ku jirtaa sida aad adigu ugu qanacsan tahay nolosha aad ku nooshahay.
hadhwanaagnews 
