hadhwanaagnews
Waa inaad ogaataa in nolosha adduunyadu aanay ahayn meel lagu helo nasasho joogto ah. Qof kastaa wuxuu la kulmaa imtixaan, daal, murugo, farxad iyo masuuliyado kala duwan. Qof walba wuxuu leeyahay duruufo u gaar ah, dhammaanteenna waxaynu u soconnaa maalinta aynu Alle SWT la kulmi doonno.
Mu’minku marka uu adduunkan ku daalo imtixaannada iyo culaysyada nolosha, wuxuu rajaynayaa naxariista Alle iyo in nasashada dhabta ah iyo farxadda aan dhammaadka lahayn ay ku sugayaan Jannada, haddii Alle naxariistiisa ku galladeeyo.
Sidaas darteed, marka ay noloshu kugu adkaato, xusuusnow in adduunyadu tahay meel imtixaan, aakhiraduna tahay halka uu qofku rajaynayo abaalmarinta camalkiisa wanaagsan. Samir yeelo, Alle talo saaro, ducada badso, hana ka quusan naxariista Rabbigaaga.
Alle SWT wuxuu Qur’aanka Kariimka ah ku yidhi:
﴿فَادْخُلِي فِي عِبَادِي وَادْخُلِي جَنَّتِي﴾
Macnaha: "Ee addoommadayda la gal, Jannadaydana gal.” (Suuratul-Fajr, aayadaha 29–30).
Waa bishaaro weyn in qofka mu’minka ahi rajaynayo maalinta uu Rabbigiis la kulmayo, laguna sharfayo gelitaanka Jannada. Waa halka ay ku dhammaanayaan dhibaatada iyo daalkii adduunka, laguna helayo nicmooyin aan dhammaanayn, haddii Alle inagu galladeeyo naxariistiisa.
Allow, naga yeel kuwa samra marka la imtixaamo, ku shukriya marka la nicmeeyo, kuna noqda marka ay gefaan. Maalinta aynu kula kulmayno nagu galladee naxariistaada, nagana yeel kuwa lagu yidhaahdo: "Addoommadayda la gal, Jannadaydana gal.”
Aamiin, yaa Rabbal-caalamiin.
Hadhwanaagnews marnaba masuul kama aha Aragtida dadka kale. Qoraaga ayaa xumaanteeda, xushmadeeda iyo xilkeeda sida. waxa kaliya oo Hadhwanaagmedia dhiirigalinaysaa, isdhaafsiga aragtida, canaanta gacaliyo talo wadaagga!
