hadhwanaagnews
Guddoomiye Ku-xigeenka Labaad ee Golaha Wakiillada Jamhuuriyadda Somaliland, Cali Xaamud Jibriil, ayaa sheegay in xukuumadda Wadajir iyo Waxqabad ee uu hoggaaminayo Madaxweynaha JSL ay si weyn u shaqaynayso, isla markaana ay ku tallaabsatay horumar la taaban karo.
Guddoomiye ku-xigeenku waxa uu sidoo kale sheegay in Madaxweynaha Jamhuuriyadda Somaliland uu guul ka gaadhay dedaallada aqoonsi raadinta, gaar ahaan sanadkii ugu horreeyey ee muddada xilkiisa.
Khudbad Lagu Jeediyey London
Cali Xaamud Jibriil ayaa hadalkan ka jeediyey munaasabad ka dhacday magaalada London oo lagu xusayay 26-ka Juun, halkaas oo uu ku bogaadiyey siyaasadda arrimaha dibadda ee Somaliland iyo dadaallada socda ee lagu xoojinayo xidhiidhada caalamiga ah.
Waxa uu tilmaamay in dalal badan ay ku soo wajahan yihiin aqoonsiga Somaliland, isla markaana ay jirto rajo weyn oo ku aaddan horumarka qaddiyadda Somaliland.
Hadalka Guddoomiye Ku-xigeenka
Cali Xaamud Jibriil ayaa yidhi:
"Xukuumadda uu hoggaaminayo Madaxweynaha JSL aad bay u shaqaynaysaa, waana in xukuumaddeena isbarbar taagno. Wadamo badan ayaa soo socda oo waa la hubaa, siyaasaddeenna arrimaha dibadduna meel cad bay istaagtay.”
Xoojinta Iskaashiga Qaranka
Guddoomiye ku-xigeenku waxa uu ku baaqay in la xoojiyo wada-shaqaynta iyo isku duubnida hay’adaha dowladda iyo shacabka, si loo sii ambaqaado horumarka iyo himilooyinka qaranka Jamhuuriyadda Somaliland.
