hadhwanaagnews
Wasiirka Madaxtooyada Jamhuuriyadda Somaliland, Khadar Xuseen Cabdi, ayaa sheegay in caddaaladdu ay tahay tiirka ugu muhiimsan ee lagu xaqiijin karo amniga, xasilloonida iyo horumarka bulshada, isaga oo ku baaqay in la xoojiyo nidaamka garsoorka iyo ku dhaqanka caddaaladda.
Wasiirku waxa uu hadalkan ka jeediyey Shirweynaha Heer Qaran ee Garsoorka Jamhuuriyadda Somaliland, halkaas oo uu ku adkeeyey muhiimadda ay caddaaladdu u leedahay dhismaha dowladnimo iyo kalsoonida shacabka.
Caddaaladdu Waa Saldhigga Amniga
Khadar Xuseen Cabdi ayaa sheegay in marka la helo caddaalad dhab ah ay si toos ah u suurtogasho sugidda amniga iyo xoojinta kalsoonida ay bulshadu ku qabto hay’adaha dowladda.
Waxa uu tilmaamay in caddaaladdu ay tahay aasaaska nabadda iyo horumarka, halka caddaalad-darraduna ay horseeddo tabasho iyo colaad.
Ka Hadlay Arrinta Aqoonsiga Somaliland
Wasiirka ayaa sidoo kale ka hadlay qaddiyadda aqoonsiga Somaliland, isaga oo sheegay in Somaliland ay muddo dheer la kulmaysay waxa uu ku tilmaamay caddaalad-darro caalami ah.
Waxa uu xusay in inkasta oo Somaliland buuxisay shuruudihii dowladnimo, haddana ay jiraan dalal aan weli aqoonsan jiritaankeeda.
Hadalka Wasiirka
Wasiirka Madaxtooyada ayaa yidhi:
"Haddii caddaalad dhab ah la helo, waxa hubaal ah in amniguna sugmayo. Caddaaladdu waa godob la'aan, laakiin caddaalad-darradu waa godob. Somaliland oo dhan ayaa caddaalad-darro laga galay. Mana jirto caddaalad-darro ka weyn dulmiga Somaliland laga gelayo ee la leeyahay ma jirtaan.”
Baaq Lagu Xoojinayo Garsoorka
Wasiirku waxa uu ugu baaqay hay’adaha garsoorka iyo dhammaan bahda caddaaladda inay sii xoojiyaan ku dhaqanka sharciga, isla xisaabtanka iyo hufnaanta, si loo xaqiijiyo nidaam garsoor oo cadaalad u siman dhammaan bulshada Somaliland.
