hadhwanaagnews
Madaxweynaha Jamhuuriyadda Somaliland, Mudane Cabdiraxmaan Maxamed Cabdillaahi (Cirro), ayaa maanta si rasmi ah u daah-furay Imtixaanaadka Shahaadiga ah ee Dugsiyada Dhexe iyo Dugsiyada Sare ee Jamhuuriyadda Somaliland.
Munaasabadda daah-furka ayaa ka dhacday Dugsiga Sare ee Faarax Oomaar ee magaalada Hargeysa, halkaas oo Madaxweynaha uu guul iyo dhiirrigelin ugu diray dhammaan ardayda u fadhiisatay imtixaanaadka qaranka.
Tiradii Ugu Badnayd oo Imtixaanka Fadhiisatay
Madaxweynaha ayaa sheegay in sannadkan 2026 uu yahay kii ugu horreeyey ee ay tiradii ugu badnayd ee arday ahi u fadhiistaan imtixaanaadka shahaadiga ah tan iyo markii Somaliland dib ula soo noqotay madaxbannaanideeda.
Sannadkan waxaa imtixaanka u fadhiistay 42,519 arday, taas oo noqotay tiradii ugu badnayd ee taariikhda imtixaanaadka Somaliland la diiwaangeliyo.
Madaxweyne Cirro oo Dhiirrigeliyey Ardayda
Madaxweynuhu waxa uu hambalyo iyo dhiirrigelin u diray dhammaan ardayda maanta u fadhiisatay imtixaanka, isaga oo u rajeeyey inay gaadhaan natiijooyin wanaagsan oo ka tarjumaya dadaalkoodii, kartidoodii iyo aqoontii ay muddada dheer soo baranayeen.
Waxa uu sidoo kale ku boorriyey ardayda inay ku kalsoonaadaan aqoontooda, ilaaliyaanna anshaxa iyo hufnaanta imtixaanka.
Madaxweyne Cirro oo U Mahadceliyey Bahda Waxbarashada
Ugu dambayn, Madaxweynaha Jamhuuriyadda Somaliland ayaa uga mahadceliyey Wasaaradda Waxbarashada, Barbaarinta iyo Sayniska, Xafiiska Imtixaanaadka Qaranka, Ciidanka Booliska, macallimiinta iyo dhammaan cid kasta oo door ka qaadatay diyaarinta, sugidda amniga iyo qabsoomidda imtixaanaadka shahaadiga ah ee qaranka.
Madaxweynuhu waxa uu sheegay in imtixaanaadka qaranku ay yihiin tiir muhiim u ah tayeynta waxbarashada iyo kobcinta mustaqbalka jiilka soo koraya.
