hadhwanaagnews
Madaxweynaha Jamhuuriyadda Somaliland, Mudane Cabdiraxmaan Maxamed Cabdillaahi (Cirro), ayaa maanta si nabad ah dalka dib ugu soo laabtay, kadib booqasho rasmi ah oo taariikhi ah oo uu ku tagay dalka Israa’iil, iyadoo si diirran oo xamaasad leh loogu soo dhaweeyey Caasimadda Hargeysa.
Madaxweynaha ayaa sheegay in safarkaasi uu ahaa guul muhiim u ah Jamhuuriyadda Somaliland, isla markaana uu xoojinayo dedaallada lagu ballaadhinayo xidhiidhada caalamiga ah iyo raadinta aqoonsiga Somaliland.
Iskaashi Dhinacyo Badan Leh
Madaxweyne Cirro ayaa xusay in dowladda iyo shacabka Israa’iil ay muujiyeen rabitaan dhab ah oo ku aaddan xoojinta iskaashiga labada dal, isaga oo tilmaamay in wada-shaqayntu ay taaban doonto dhinacyo badan oo muhiim u ah horumarka Somaliland.
Waxa uu sheegay in iskaashigaasi uu diiradda saari doono horumarinta dhaqaalaha, amniga, beeraha, biyaha, maalgashiga, tiknoolajiyadda, kaabeyaasha dhaqaalaha iyo kobcinta awoodaha hay’adaha dowladda.
Horumar Waara
Madaxweynuhu waxa uu tilmaamay in iskaashiga cusub uu horseedi doono fursado horumarineed oo waara, kuwaas oo faa’iido u leh labada dal iyo labada shacab.
Waxa uu xusay in xukuumaddiisu sii wadi doonto dedaallada lagu xoojinayo xidhiidhka caalamiga ah iyo horumarinta danaha qaranka Somaliland.
Soo Dhaweyn Ballaadhan
Madaxweynaha iyo weftigiisa ayaa markii ay dalka dib ugu soo laabteen waxaa si ballaadhan ugu soo dhaweeyey masuuliyiin ka tirsan xukuumadda, madax-dhaqameed, siyaasiyiin iyo kumannaan shacab ah oo isugu soo baxay waddooyinka magaalada Hargeysa si ay u muujiyaan taageeradooda.
