hadhwanaagnews
Laasgeel, Somaliland – Safiirka Maraykanka ayaa maanta booqasho ku tegay goobta taariikhiga ah ee Laasgeel, oo ka mid ah meelaha ugu muhiimsan ee dhaxalka taariikhiga ah iyo dalxiiska Jamhuuriyadda Somaliland.
Safiirka ayaa waxaa goobta ku soo dhaweeyey masuuliyiin ka tirsan Wasaaradda Ganacsiga iyo Dalxiiska Somaliland, oo ay ka mid ahaayeen Wasiir Ku-xigeenka Wasaaradda Ganacsiga iyo Dalxiiska, Mudane Jawhar Siciid Warsame, Agaasimaha Guud ee Wasaaradda, Eng. Maxamuud Xuseen Aadan (Jabaake), iyo qaar ka mid ah Agaasime-waaxeedyada Wasaaradda.
Warbixin Ku Saabsan Taariikhda Laasgeel
Intii ay booqashadu socotay, madaxda Wasaaradda Ganacsiga iyo Dalxiiska ayaa Safiirka ka siiyey warbixin faahfaahsan oo ku saabsan taariikhda, qiimaha iyo muhiimadda ay goobta Laasgeel u leedahay dhaxalka aadanaha iyo horumarinta dalxiiska Somaliland.
Masuuliyiintu waxay sidoo kale sharaxeen dadaallada socda ee lagu ilaalinayo laguna horumarinayo goobtan qadiimiga ah, oo caan ku ah farshaxannada dhagaxyada ku sawiran ee lagu qiyaaso kumannaan sano jir.
Kormeer Lagu Sameeyey Goobta
Safiirka ayaa kormeer ku maray qaybaha kala duwan ee goobta Laasgeel, isaga oo si gaar ah u danaynayey taariikhda iyo astaamaha gaarka ah ee ka dhigaya mid ka mid ah goobaha ugu muhiimsan ee hidde-dhaqameedka iyo dalxiiska Geeska Afrika.
Booqashadan ayaa muujinaysa xiisaha sii kordhaya ee ay bulshada caalamku u qabto goobaha taariikhiga ah ee Somaliland iyo muhiimadda ay u leeyihiin ilaalinta dhaxalka aadanaha iyo kobcinta dalxiiska.
Laasgeel oo Ah Astaan Taariikheed
Laasgeel ayaa lagu tiriyaa meelaha ugu caansan ee lagu kaydiyey farshaxanka qadiimiga ah ee Geeska Afrika, waxaana loo arkaa hanti taariikheed oo qiimo weyn ugu fadhida Somaliland iyo guud ahaan dunida.
Masuuliyiinta Wasaaradda Ganacsiga iyo Dalxiiska ayaa xusay in ay sii wadi doonaan dadaallada lagu horumarinayo goobaha dalxiiska iyo kor u qaadista sumcadda Somaliland ee dhinaca dalxiiska iyo dhaxalka dhaqanka.
 |
 |
 |
 |
