hadhwanaagnews
Madaxweynaha Senegal, Bassirou Diomaye Faye, ayaa xilka ka qaaday Ra’iisul Wasaarihii dalka Ousmane Sonko, isla markaana kala diray golihii xukuumadda, kadib khilaaf siyaasadeed oo muddooyinkii dambe ka dhex aloosnaa labada hoggaamiye ee hore xulafada u ahaa. Go’aanka ayaa si rasmi ah loogu shaaciyey warbaahinta dowladda, iyadoo wasiirradii xukuumadda loo faray inay sii wadaan shaqooyinka maalinlaha ah ilaa xukuumad cusub la magacaabayo.
Khilaafka ayaa sii xoogaystay kadib markii Sonko si cad u dhaliilay qaabka Madaxweyne Faye u wajahayo xaaladda dhaqaale ee dalka, gaar ahaan deynta sii kordhaysa iyo wadahadallada adag ee Senegal kula jirto Hay’adda Lacagta Adduunka (IMF). IMF ayaa hakisay barnaamij amaah ah oo Senegal la lahayd, iyadoo deynta dalka lagu qiyaasay inay gaartay 132% GDP-ga, arrintaas oo cadaadis weyn ku abuurtay xukuumadda.
Kadib xil ka qaadistan, boqolaal taageerayaal ah ayaa dibadbaxyo taageero u sameeyey Sonko magaalada Dakar, halka aan weli la magacaabin Ra’iisul Wasaare cusub, taasoo sii kordhisay walaaca laga qabo xasilloonida siyaasadeed ee Senegal.
