HADHWANAAGNEWS
Hoggaamiyaha dalka Qatar, Amiir Sheikh Tamim bin Hamad Al-Thani, ayaa digniin ka bixiyey saamaynta dagaalka u dhexeeya Iran, Maraykanka iyo Israa’iil, isagoo sheegay in sii socoshada colaaddani ay keeni karto saameyn khatar ah oo gaadha amniga iyo nabadda caalamka.
Sida ay werisay Qatar News Agency, Amiir Tamim ayaa khadka taleefanka kula hadlay Madaxweynaha Maraykanka Donald Trump, iyaga oo ka wada hadlay xaaladda amni ee sii xumaanaysa ee gobolka.
Qoraal ay wakaaladdu baahisay ayaa lagu sheegay in labada hoggaamiye ay ka hadleen weerarrada Iran ee lagu eedeeyay inay ku wajahan yihiin Qatar iyo dalal kale oo gobolka ah, iyo sidoo kale dadaallada lagu xakamaynayo xiisadda sii kordhaysa.
Amiirka Qatar ayaa carrabka ku adkeeyey in:
Sii xumaanshaha xaaladda gobolka ay yeelan karto saameyn halis ah oo caalami ah
Ay muhiim tahay in la dejiyo xiisadda
In la xoojiyo diblomaasiyadda si loo soo afjaro colaadda
Wuxuu sidoo kale sheegay in Qatar aysan ka labalabayn doonin difaaca madax-bannaanideeda, amnigeeda iyo danaha qarankeeda.
Dhanka kale, Aqalka Cad wax faahfaahin ah kama bixin wicitaankaas.
Qatar waxay martigelisaa saldhigga militari ee ugu weyn Maraykanka ee Bariga Dhexe, waxaana la sheegay inay la kulantay weerarro gantaallo ah oo ka imanaya Iran iyadoo xiisadda gobolka sii xoogaysanayso. Ilo-wareedyo ayaa sidoo kale sheegay in diyaaradaha Qatar ay soo rideen diyaarado aan duuliye lahayn oo Iran laga leeyahay, wax yar ka hor intii aanay weerarin saldhig militari oo Maraykanku leeyahay.
