hadhwanaagnews
Xagaagii wuu dhammaaday, fasaxyadiina waxay u egyihiin xusuus fog, waxaana si lama filaan ah u muuqata in adduunku mar kale si buuxda ugu soo laabtay xawaarahiisii caadiga ahaa.
Tamartaas dib-u-bilaabashada ah waxay sababi kartaa in dad badan ay dareemaan daal iyo kala daadsanaan.
Walbahaarka, marka uu yahay mid yar, wuxuu ina caawiyaa inaan aragti ka yeellanno, balse haddii aan la xakameyn, si tartiib ah ayuu u dhaawici karaa caafimaadkeenna, niyaddeenna iyo xiriirradeenna.
Kortisolka [Cortisol] oo inta badan loo yaqaan "hormoonka walbahaarka" wuxuu noqday eray caan ka ah arrimaha caafimaadka, balse waa muhiim in la xasuusto inuusan cadow ahayn. Waa kan naga caawiya inaan soo toosno, feejignaano, oo aan wajahno caqabadaha nolosha.
Sirta dhabta ahi waa in la ilaaliyo dheelitirnaanta, ee aan meesha laga saarin.
Haddaba halkan waxaan ku qeexaynaa shan siyaabood oo fudud oo cilmi ku dhisan si loo maareeyo walbahaarka loona soo celiyo xakameynta naftaada.
1 Ha ka welwelin walbahaarka laftiisa.
Si la yaab leh, walwalka ku saabsan saameynta walbahaarka wuxuu ka dhigi karaa mid ka sii daran.
Markaan hadalno inta uu walbahaarku waxyeello leeyahay, waxaan bilownaa inaan ka fikirno "haye, hadda waan walwalsanahay, waana ogahay inuu i dhaawacayo," sidaas darteed isku day inaadan ka welwelin sida aad dareemayso.
Walbahaarku waa qayb caadi ah oo nolosha ka mid ah, mana aha wax laga cararo, gaar ahaan marka la marayo waqtiyo adag sida murugada, daryeelka dadka la jecel yahay, korinta carruurta yar yar ama hubanti la'aanta shaqada.
Halka aad argagax ka muujin lahayd inaad walwalsan tahay, aqbal in ay dhacdo oo naftaada xusuusi in aysan sii jiri doonin weligeed.
2 Dhaqaaji jidhkaaga.
Habka ugu fiican ee jir ahaan lagu maareyn karo walbahaarka waa jimicsi.
Jimicsigu wuxuu jidhka ku keenaa wax la mid ah walbahaarka, wuxuu kordhiyaa garaaca wadnaha, dhiigga ayuu dhaqaaqsiinayaa, neefsiga ayuu dedejiyaa, wuxuuna sii daayaa adrenaline iyo kortisol.
Markaad jimicsato, jidhkaagu wuu baranayaa sida loo maareeyo kororka kortisolka iyo sida loola tacaalo qulqulkiisa, taasoo kaa dhigaysa mid si wanaagsan u xakameyn kara walbahaarka nolosha.
Haddii aad bilaabeyso inaad ka walwasho nooca jimicsiga aad samayn doonto ama goobta jimicsiga aad tagi doonto, xasuuso in nooc kasta oo jimicsi ah inuu faa'iido leeyahay.
Ma aha inuu noqdo wax waqti badan qaata ama cadaadis leh, socod fudud, orod yar ama dhaqdhaqaaq aad jeceshahay ayaa kugu filan.
3. Hurdada mudnaan sii
Isku day inaad seexato goor hore oo aad toosto ku dhowaad isla waqtigaas subax walba, si jidhkaagu u helo nidaam joogto ah.
Haddii aad habeenkii dhinac dhinac isu rogto oo aanad seexan karin, ha welwelin.
Jidhkaagu mararka qaar wuu shaqayn karaa isagoo hurdo yar hela, waqti ka dibna nidaamkaaga dabiiciga ah ayaa dib isu hagaajin doona.
4. Diiradda saar naftaada
Maareynta walbahaarku kaliya ma aha in laga fogaado waxyaabaha taban, waa sidoo kale in si firfircoon aad u dhisto naftaada.
Hubi inaad si wanaagsan u cunto midhaha, khudaarta, cuntooyinka dabiiciga ah iyo borotiinnada tayo leh si jidhkaagu u helo tamar iyo nafaqo.
Sidoo kale isku day inaad waqti kuu gaar ah samaysato, waqti aad ku nasto oo aad dib ugu cusboonaysiiso qorshayaashaada
dhiifoonaanta (mindfulness) ayaa sidoo kale ku caawin kartaa , ma aha in aad khasab ahaan iska fadhiisato mel, balse waa in aad si ula kac ah u wajahdo noloshaada.
Qaado dhowr daqiiqo oo aad ku fikirto maalinta ama toddobaadka kuu soo socda, maxay noqon karaan caqabadaha, sideese si tartiib ah aad isaga maamuli kartaa?
Aniga ahaan, qorshaynta hore ee karinta cuntada ayaa iga caawisa inaan yareeyo walbahaarka fiidkii marka shaqada laga yimaado.
5. Ka hadal dhibkaaga
Anigu si xun ayaan walwal uga dareemaa waxyaabo badan, waana caadi in qof walba uu ka walwalo arrimo la xidhiidho lacag, shaqo ama qoys.
Walbahaarradaas waxay si dhakhso ah u koraan haddii aad gudaha ku haysato, sidaa darteed la wadaag qof aad ku kalsoon tahay. Taasi waxay yareynaysaa culayska waxayna ku siisaa aragti cusub, xitaa haddii uusan qofkaasi kuu xallin karin dhibaatada.
Mararka qaarkood, kaliya in aad arrinta cod ku sheegto ayaa ka dhigta dhibka mid sahlan oo la xakameyn karo
