hadhwanaagnews
Jamhuuriyadda Somaliland waxa ay markale qaaday tallaabo weyn oo ay ku muujinayso horumarinta kaabayaasha dhaqaalaha, bilicda magaalooyinka iyo kobcinta adeegyada casriga ah, kuwaas oo kaalin wayn ka qaadanayo xoojinta sumcadda iyo bilicda Somaliland, isla markaana si weyn uga markhaati kacaya ammaanka iyo xasiloonida buuxda ee dalkani ku naaloonayo, kadib markii Madaxweynaha Jamhuuriyadda, Mudane Cabdiraxmaan Maxamed Cabdillaahi (Cirro 25 August 2025 si rasmi ah xadhigga uga jaray Huteel casri ah oo cusub oo lagu magacaabo Serene SARAVOR PREMIER, kaas oo laga hirgeliyey caasimadda Hargeysa, isla markaana loo dhisay hab tayo sare leh oo loogu talo galay in uu la jaanqaado habka lagu qiimeeyo darajada Huteellada Caalamka. Iyada oo Huteelkani darajediisu ay tahay shan xiddigood (5 Star).
Huteelkan oo ah kii ugu horreeyay ee noociisa ah oo heerkiisu yahay 5 xiddigood (5-Star) ee laga hirgeliyo Somaliland, ayaa tusaale cad u ah sida uu dalku u korayo, isku-beddelayo, isla markaana ay u bislaadeen fursadaha maalgashi ee jira. Muddada dhismihiisu socday ee 9-ka sannadood, Huteelku waxa uu haatan noqday mid ka mid ah astaamaha muuqda ee lagu cabbirayo kobaca iyo horumarka magaalada Hargeysa iyo guud ahaan Jamhuuriyadda Somalilad.
Intii ay munaasibaddu socotay, waxa hadallo muhiim ah ka jeediyey madaxda dowladda, ganacsatada iyo hormuudka shirkadda Saravor Premier. Madaxweynaha Qaranka ayaa hadal qiimo leh ku muujiyey sida maalgashigan ballaadhani uu astaan cad uga yahay kalsoonida ay maalqabeennadu ku qabaan nidaamka siyaasadeed, nabadgelyo iyo fursadaha dhaqaale ee Somaliland. Waxa uu si gaar ah ugu bogaadiyey mulkiilaha mashruucan, Mudane Cabdikariim Maxamed Iid, isagoo ugu baaqay ganacsatada kale in ay dalkooda maalgashadaan, halkii ay dibadda fursado uga raadin lahaayeen.
Furitaanka SARAVOR PREMIER waxa uu furayaa waddooyin cusub oo ah:
Saravor Premier oo ah goob ganacsi oo cusub waxay abuuri doontaa shaqooyin badan oo dheeraad ah, gaar ahaan dhallinyarada iyo xirfadlayaasha maxaliga ah ee u dhashay Jamhuuriyadda Somalialnd.
Tallaabadan horumarineed waxay kobcin doontaa dhaqaalaha deegaanka iyada oo kordhinaysa ganacsiga, dakhliyada iyo maalgelinta.
Hoteelkan casriga ah ee SARAVOR PREMIER waxa uu bulshada reer Somaliland iyo guud ahaan martida caalamiga ah ee soo booqata Somaliland uu u soo kordhinayaa adeegyo casri ah oo tayo sare leh, kuwaas oo aan hore uga jirin gudaha Somaliland, isla markaana daboolaya baahiyaha casriga ah ee macaamiisha si hufan oo heer caalami ah.
Goobtan cusub oo uu maalgashiga ballaadhan geliyay ganacsade Cabdikariin Maxamed Ii doo ah muwaadin reer Somaliland ahi, waxay noqon kartaa meel soo jiidasho leh oo ay dadka mandaqada Geeska Afrika iyo kuwa caalamkuba ay ku yimaadaan dalxiis, wax iibsasho, iyo madadaalo.
Hoteelkan casriga ah ee Serene Saravor Premier waxa uu noqon doontaa goob si weyn kor ugu qaada sumcadda ay Jamhuuriyadda Somaliland ku leedahay dunida inteeda kale, sidoo kale waxay noqonaysaa goob caalami ah oo kulmisa bulshada reer Somaliland iyo dadka ajaanibta ah ee dalka ku sugan, gaar ahaan saraakiisha iyo shaqaalaha ajaanibta ah ee u shaqeeya hay’addaha caalamiga ah iyo shirkadaha taas oo kor u qaadaysa dalxiiska iyo xidhiidhka bulshada.
Waxay dhiirrigelinaysaa ganacsatada kale iyo hannaanka ganacsi ee Somaliland, taas oo xoojinaysa isla markaaan horseedaysa tartan furan oo la xidhiidha suuqa xorta ah, isla markaana ganacsatada kale ku dhiirigelinaysa in ay horumariyaan adeeggooda si ay ula tartamaan.
Waxa kale oo la tilmaami karaa in huteelkan uu yahay calaamad ka mid ah dhaq-dhaqaaqa cusub ee ganacsi ee ku soo wajahan horumarka Jamhuuriyadda Somaliland. Maalgelinta hoteelkani maaha oo kaliya mid ku salaysnayn faa’iido dhaqaale, balse sidoo kale waa mid kobcinaysa bilicda magaalooyinka, dhisaya adeegyo la jaanqaadaya heerarka caalamiga ah, isla markaana dhiirrigelinaya hal-abuurka gudaha.
Somaliland waxa ay maanta muujisay in ay diyaar u tahay in ay martigeliso, oo ay soo dhawayso, una adeegto maalgashadayaal doonaya adeeg heer sare ah, amni sugan iyo jawi siyaasi oo deggan. SARAVOR PREMIER maahan oo kaliya huteel, waa tilmaam muuqda oo ka mid ah guulaha ay Somaliland ka gaadhay dhismaha dawladnimada, fursadaha ganacsi iyo bilicda magaalooyinka.
Ugu dambayn, waxa aan bogaadin iyo ammaan u diraynaa mulkiilaha huteelka, dhammaan hawl-wadeennadii dhisay, iyo hay’adaha dawliga ah ee fududeeyay hirgelinta mashruucan. Waxa la sugayaa in mashruucani uu noqdo dhiirrigelin rasmi ah oo lagu furfuro maalgashi kale oo la mid ah, si bulshadeennu uga faa’iideyso, dalkuna uga horumaro dhinacyo badan. Huteelka SARAVOR PREMIER waa bilow cusub oo muujinaya wejiga cusub ee Hargeysa, iyo wajiga cusub ee dunidu ka dheehanayso horumarka toolmoon ee Somaliland.
