Xukuumadda Sucuudiga ayaa kulankan u aragta fursad
Madaxweyne Trump oo Kulan Muhiim ah Kula Leh Ganacsatada iyo Hoggaamiyeyaasha Sucuudiga Magaalada Riyaad
Riyaad, Sucuudi Carabiya – Madaxweynaha Mareykanka, Donald Trump, ayaa lagu wadaa inuu Salaasada si rasmi ah u booqdo Qasriga Boqortooyada ee magaalada Riyaad, halkaas oo uu ka qayb geli doono kulan heer sare ah oo ay isugu imanayaan wufuudda Mareykanka iyo Sucuudi Carabiya, iyo madaxda shirkadaha waaweyn ee caalamka.
Kulankan ayaa lagu tilmaamay mid muhiim u ah xoojinta xidhiidhka laba geesoodka ah, iyadoo diiradda la saarayo iskaashi dhaqaale, ganacsi, iyo horumarinta fursadaha maalgelinta ee labada dal.
Waxaa ka mid ah madaxda ka qayb galaya Elon Musk, oo ah madaxa shirkadaha caanka ah ee Tesla iyo SpaceX, kaas oo lagu wado inuu door muuqda ka ciyaaro wadahadallada la xidhiidhka teknoolojiyadda, tamarta, iyo sahayda mustaqbalka.
Xukuumadda Sucuudiga ayaa kulankan u aragta fursad dahabi ah oo lagu xoojinayo xidhiidhka istiraatiijiyadeed ee kala dhexeeya Mareykanka, gaar ahaan dhinacyada ganacsiga iyo amniga.
Dhanka Mareykanka, booqashada Madaxweyne Trump ayaa ah tallaabo muhiim ah oo lagu muujinayo doorka uu doonayo inuu ku yeesho Bariga Dhexe, iyadoo la tixgelinayo danaha istiraatiijiyadeed ee labada dhinac.
Kulankan ayaa sidoo kale la filayaa inuu horseedo heshiisyo iyo is-afgaradyo ganacsi oo cusub, kuwaas oo lagu dhisi doono mustaqbalka dhow, loogana faa’iideyn doono labada dal iyo shirkadaha gaar loo leeyahay.
hadhwanaagnews 
