Waqtiga ayaa sheegi doona.
Xisbiga Kulmiye, oo muddo dheer ahaa xisbiga haya talada Somaliland, wuxuu galay marxalad xasaasi ah oo ay hareeyeen khilaafyo siyaasadeed oo xooggan. Khilaafka haatan ka dhex aloosan hoggaanka sare ee xisbiga ayaa u muuqda mid ruxaya aasaaska Kulmiye, iyadoo laba garab ay si cad u kala safteen.
Khilaafka U Dhaxeeya Labada Garab
Doodda ugu weyn ee haatan taagan waxay dhex taallaa laba dhinac oo waaweyn oo kala ah:
Garabka Guddoomiyaha Xisbiga Kulmiye – Maxamed Kaahin Axmed
Garabkan waxaa hoggaaminaya:
1. Guddoomiyaha Xisbiga Kulmiye – Maxamed Kaahin Axmed
2. Guddoomiye Ku-xigeenka 1aad – Cabdicasiis Maxamed Samaale
3. Guddoomiye Ku-xigeenka 2aad – Axmed Cabdi Dheere
Garabkan ayaa aaminsan in hoggaanka xisbiga ay tahay in lagu ilaaliyo nidaamka iyo sharciga xisbiga, halka madaxweynihii hore ee Somaliland, Muuse Biixi Cabdi, looga fadhiyo inuu dib uga noqdo arrimaha hoggaaminta xisbiga maadaama uu xilka ka degay. Waxa ay qabaan in xisbiga ay taladiisa leeyihiin hoggaanka rasmiga ah, iyagoo doonaya in la ilaaliyo nidaamka xisbiga Kulmiye.
Garabka Madaxweynihii Hore ee Somaliland – Muuse Biixi Cabdi
Garabkan waxaa hormuud u ah:
1. Madaxweynihii Hore ee Somaliland – Muuse Biixi Cabdi
2. Guddoomiye Ku-xigeenka 3aad – Saleebaan Cali Koore
3. Guddoomiye Ku-xigeenka 4aad – Maxamuud Xasan Sacad (Saajin)
Muuse Biixi iyo kooxdiisu waxay rumeysan yihiin in isaga weli uu yahay shakhsiga ugu saameynta badan xisbiga, maadaama uu haysto taageerada beesha Habar Awal. Waxay doonayaan inay xisbiga u jiheeyaan jihada ay iyagu rabaan, iyagoo isticmaalaya cudud siyaasadeed iyo codad ay ku leeyihiin gudaha xisbiga.
Kulankii Madaxtooyada iyo Caddeynta Khilaafka
Xaaladda sii cakiran ayaa si gaar ah usoo shaac baxday kaddib markii garabka Guddoomiyaha Kulmiye Maxamed Kaahin uu la kulmay madaxtooyada, kulankaas oo si rasmi ah looga baahiyay barta Facebook ee madaxtooyada. Waxaa xusid mudan in kulankaasi uusan ka muuqan barta rasmiga ah ee Xisbiga Kulmiye ama warbaahinta taageerta Muuse Biixi, taasoo muujineysa in labada dhinac si weyn u kala fogaanayaan.
Dhinaca kale, afhayeenka xisbiga Kulmiye, Cabdinaasir Buuni, oo hore loogu bartay inuu si degdeg ah u baahiyo wararka xisbiga, ayaan wax faallo ah ka bixin kulankaas. Wararka hoose ayaa sheegaya in sababta uu Buuni uga aamusay ay tahay inuu ka tirsan yahay garabka Muuse Biixi, taasoo muujineysa in xitaa xisbiga gudihiisa ay jiraan kala qaybsanaan dhinaca warbaahinta ah.
Maxay Taas Ka Dhigan Tahay?
Khilaafka ka dhex jira Kulmiye wuxuu muujinayaa labo arrimood oo muhiim ah:
1. Muuse Biixi Weli Wuxuu Damacsan Yahay Hoggaaminta Xisbiga
– Inkastoo uu xilka madaxweynaha ka degay, haddana wuxuu weli doonayaa inuu xisbiga ku hoggaamiyo codka beeshiisa, taasoo khatar galin karta madax-bannaanida xisbiga.
2. Maxamed Kaahin Wuxuu U Baahan Yahay Taageero Xooggan
– Si uu ugu guuleysto hoggaaminta xisbiga, waa inuu kasbadaa taageerada xubnaha sare iyo madaxtooyada si loo joojiyo saameynta Muuse Biixi.
Maxamed Kaahin Maka Badbaadi Doonaa Culeyska Siyaasadeed ee Muuse Biixi?
Weli lama saadaalin karo halka ay xaaladdu ku dambeyn doonto, balse waxa muuqata in Guddoomiye Maxamed Kaahin uu wajahayo caqabado waaweyn. Haddii uu heli waayo taageerada madaxtooyada iyo garabyada kale ee xisbiga, waxaa suurtagal ah in Muuse Biixi uu sii xoojiyo saameyntiisa, taasoo keeni karta in Kaahin luminayo awooddiisa hoggaamineed.
Xisbiga Kulmiye wuxuu marayaa marxalad xasaasi ah, waxaana laga yaabaa in khilaafkan uu horseedo burbur iyo kala jab xisbiga dhexdiisa ah. Waxaa la sugayaa halka uu ku dambeyn doono dagaalka siyaasadeed ee u dhexeeya Maxamed Kaahin iyo saaxiibkii hore, Muuse Biixi.
Guddoomiyaha Xisbiga Kulmiye maka dabaalan doonaa daadadka siyaasadeed ee kaga soo rogmanaya saaxiibkii hore Muuse Biixi, mise wuu qaadi doonaa?
Waqtiga ayaa sheegi doona.
© Moh'et Ollat
hadhwanaagnews 
