Hadhwanaag
Madaxweynaha Somaliland, Dr. Cabdiraxmaan Maxamed Cabdillaahi (Cirro), waa siyaasi leh waayo-aragnimo dheer iyo xirfad hoggaamineed oo laga dheehan karo heerarkii kala duwanaa ee uu soo maray. Socdaalkiisa siyaasadeed wuxuu u muuqdaa mid xambaarsan aragti, khibrad, iyo biseyl ku dhisan talo qaadasho iyo samir.
Khibraddiisa Hoggaamineed:
1. Safaarado iyo Xidhiidh Dibadeed:
Muddo dheer ayuu ahaa safiir, isaga iyo ku-xigeenkiisuba waxay soo qabteen shaqooyin muhiim ah oo dibadda ah. mas’uuliyadahaas, taasoo ka tarjumeysa fahamka uu u leeyahay siyaasadda caalamka.
2. Guddoomiyaha Golaha Wakiillada (12 Sano):
Intii uu ahaa guddoomiyaha Golaha Wakiillada, wuxuu soo maamulay doodaha muhiimka ah iyo sharciyadii dalka lagu hagayay. Waqtigaas wuxuu muujinayaa sida uu u yahay siyaasi isku dheellitiran, garowsan muhiimadda wada shaqeynta iyo dhexdhexaadnimada.
3. Guddoomiyaha Xisbiga Waddani (9 Sano):
Sagaalka sano oo uu hoggaaminayay Xisbiga Waddani wuxuu xisbiga gaadhsiiyay heer uu noqdo mid awood leh oo horyaal ka ah siyaasadda dalka. Dulqaadka iyo hannaanka uu ugu diyaariyay xisbigii mucaaradka ahaa inay noqdaan kuwo u diyaarsan hogaaminta qaranka ayaa muujinaya xirfadiisa iyo go’aan qaadashadiisa.
Qodobka Mudnaanta Leh:
Marka loo eego xaaladaha uu dalku ku jiray marka uu xilka la wareegayay 12 December 2024 iyo kuwa uu maanta ku jiro, waa lagama maarmaan in la tixgeliyo muddadii uu madaxweynuhu xilka hayay. Sida caadiga ah, waxaa habboon in lagu qiimeeyo hogaamiyaha waqti u dhigma 100 ilaa 365 maalmood (hal sano). Inta lagu guda jiro muddadaas, waxa laga cabbiri karaa:
Horumarinta dhanka dhaqaalaha.
Xallinta caqabadaha siyaasadeed.
Dib u hagaajinta adeegyada bulshada.
Habka uu ugu dheellitirayo siyaasadda gudaha iyo tan dibadda.
Aragtida Ugu Muhiimsan:
Madaxweynaha wuxuu soo maray xaalado adag oo siyaasadeed iyo kuwo bulsho, taasoo tusinaysa inuu yahay hogaamiye talo badiya, talo qaata, isla markaana xallin kara duruufaha adag. Wuxuu hayaa khibrad uu ku hogaamin karo umadda, iyadoo lagu qiimayn karo aragti iyo ficil is waafaqsan.
Waxaa muhiim ah in waqti iyo dulqaad loo yeesho si loo arko natiijada uu horseedi doono hoggaamintiisu. Waqtiga dhaw iyo kan dheerba waxay bixin doonaan sawir dhameystiran oo ku saabsan hannaanka uu Somaliland ku hoggaamin doono.
Waad mahadsantihiin!
Engr dhakoshe
Hadhwanaagnews marnaba masuul kama aha Aragtida dadka kale. Qoraaga ayaa xumaanteeda, xushmadeeda iyo xilkeeda sida. waxa kaliya oo Hadhwanaagmedia dhiirigalinaysaa, isdhaafsiga aragtida, canaanta gacaliyo talo wadaagga!
