hadhwanaagnews
Shirkadda OpenAI ayaa shaqaale hore uga tirsanaa, oo markii dambe u wareegay shirkadda Apple, ku eedaysay inuu in ka badan 100 fayl oo sir ah oo la xidhiidha badeecad aan weli la shaacin u diray akoonkiisa gaarka ah, kaddibna xogtaasi u soo bandhigay madaxda sare ee Apple, sida ay werisay wakaaladda wararka ee Reuters.
OpenAI ayaa muujisay walaac ku saabsan suurtagalnimada in Apple ay xogtaasi uga faa’iidaysato horumarinta badeecooyinkeeda sirdoonka macmalka ah (AI), taas oo dhalisay muran la xidhiidha ilaalinta xogaha ganacsi ee qarsoodiga ah.
Dhankeeda, Apple ayaa beenisay eedeymaha loo jeediyey, iyada oo sheegtay inaanay jirin wax caddayn ah oo muujinaya in shirkaddu adeegsatay xog qarsoodi ah oo ay leeyihiin shirkado kale.
Murankan ayaa qayb ka ah khilaaf sharci oo u dhexeeya labada shirkadood, kuwaas oo isku eedaynaya in si sharci-darro ah loo adeegsaday xog ganacsi oo sir ah. Dacwaddan ayaa sii xoojinaysa loollanka u dhexeeya shirkadaha waaweyn ee tiknoolajiyadda, gaar ahaan dhinaca horumarinta iyo tartanka badeecooyinka sirdoonka macmalka ah.
