xogbaahin.com
Sacuudi Carabiya ayaa si ku-meel-gaadh ah u hakisay shaqada dhuumaha shidaalka ee Bariga-Galbeed, kadib markii dhuumaha ku yaalla gobollada Riyaad iyo Madiina ay Khamiistii, 10-kii Sebtembar 2026, la kulmeen weerarro dhowr ah.
Wasaaradda Tamarta Sacuudiga ayaa sheegtay in go’aanka lagu joojiyey dhuumaha uu ahaa tallaabo taxaddar ah, iyadoo weerarradu sababeen dhaawacyo soo gaadhay qaar ka mid ah dadka, kuwaas oo la siiyey daryeel caafimaad. Kooxo gurmad iyo farsamo ayaa isla markiiba loo diray goobaha ay weerarradu ka dhaceen si loo xaqiijiyo badqabka dhuumaha.
Wasaaradda Arrimaha Dibadda Sacuudiga ayaa markii dambe sheegtay in weerarrada loo adeegsaday diyaarado aan duuliye lahayn oo ka yimid dhulka Ciraaq, iyadoo xustay inay jiraan dhaawacyo iyo waxyeellooyin qaar oo weli la dayactirayo.
Riyaad ayaa sheegtay inaysan marxaladdan ka jawaabayn weerarka, kadib codsi uga yimid Ra’iisul Wasaaraha Ciraaq oo ku aaddanaa in dowladda Ciraaq la siiyo fursad ay ku qaaddo tallaabooyin lagu joojinayo weerarrada laga soo qaadayo dhulkeeda. Si kastaba, Sacuudigu wuxuu sheegay inuu xaq u leeyahay inuu qaado tallaabo kasta oo lagama maarmaan u ah ilaalinta madaxbannaanidiisa, amnigiisa iyo kaabayaasha muhiimka ah.
Tallaabadan ayaa kusoo beegmaysa xilli ay sii kordhayaan xiisadaha gobolka, gaar ahaan weerarrada Xuutiyiinta Yemen iyo khataraha soo wajahay kaabayaasha tamarta iyo marinnada ganacsiga ee muhiimka ah ee Badda Cas iyo Bariga Dhexe.
