hadhwanaagnews
Ugu yaraan hal qof ayaa ku geeriyooday, 16 kalena way ku dhaawacmeen kaddib markii gaadhi lagu jiidhsiiyey dad ka qaybgalayey munaasabadda Pride ee ka dhacaysay magaalada Berlin ee dalka Jarmalka, sida ay sheegeen saraakiisha booliiska.
Booliiska ayaa sheegay in gaadhiga loo adeegsaday weerarka uu ahaa baabuur yar oo nooca minivan ama SUV-ga yar, kaas oo markii dambe laga helay gudaha deegaanka Tiergarten isagoo laga tagay, isla markaana u muuqday inuu ku dhacay geed, sida uu afhayeen u sheegay wakaaladda wararka ee AFP.
Ra’iisul Wasaaraha Jarmalka, Friedrich Merz, ayaa cambaareeyey dhacdada, isagoo ku tilmaamay "fal argagax leh”, isla markaana ballanqaaday in si buuxda loo baadhi doono weerarka, lana horkeeni doono caddaaladda cid kasta oo lagu helo inay ka dambaysay.
Booliiska Berlin ayaa bilaabay baadhitaan ballaadhan oo ka socda guud ahaan magaalada, iyagoo markhaatiyaasha ka codsaday inay soo gudbiyaan sawirro, muuqaallo iyo xog kasta oo ka caawin karta baaritaanka dhacdada.
Masuuliyiintu waxay sheegeen in hawlgalka baadhitaanku uu ku fidsan yahay magaalada oo dhan, iyadoo kumannaan askari la geeyey goobaha muhiimka ah, lana adeegsanayo diyaaradaha qumaatiga u kaca iyo kaamirooyin lagu taageerayo hawlgalka.
Dhankiisa, Duqa magaalada Berlin, Kai Wegner, ayaa ku tilmaamay dhacdadan "weerar lagu qaaday bulshada xorta ah ee furfuran”, isagoo muujiyey taageerada uu la garab taagan yahay dhibbanayaasha iyo qoysaskooda, isla markaana ku baaqay in si degdeg ah loo xaqiijiyo dhammaan faahfaahinta dhacdada.
