hadhwanaagnews
Masuul ka tirsan Dowladda Somaliland ayaa sheegay in Somaliland ay ka shaqaynayso sidii loo sii dayn lahaa maxaabiis Falastiiniyiin ah oo ku xidhan xabsiyada Israa’iil.
Hadalka ayaa yimid xilli ay socdaan kulamo iyo wada-hadallo u dhexeeya Somaliland iyo Israa’iil, kuwaas oo la xidhiidha xoojinta xidhiidhka diblomaasiyadeed, iskaashiga iyo arrimaha bani’aadannimada.
Masuulka ayaa xusay in Somaliland ay danaynayso taageeridda arrimaha bani’aadannimada iyo gargaarka bulshada u baahan kaalmooyinka degdegga ah, isaga oo tilmaamay in dadaalladaasi ay qayb ka yihiin aragtida Somaliland ee ku dhisan nabadda iyo iskaashiga.
Si kastaba ha ahaatee, lama shaacin faahfaahin rasmi ah oo ku saabsan tirada maxaabiista la doonayo in la sii daayo, nooca wada-hadallada socda ama heshiis rasmi ah oo arrintan la xidhiidha.
Arrintan ayaa kusoo beegmaysa xilli ay Somaliland iyo Israa’iil sii xoojinayaan xidhiidhkooda diblomaasiyadeed iyo wada-shaqaynta dhinacyo kala duwan leh.
