HADHWANAAGNEWS
Boorama – Agaasimaha Guud ee Wasaaradda Dhallinyarada iyo Ciyaaraha Somaliland, Cabdilaahi Maxamed Maxamuud Jiidhe, oo uu weheliyo Guddoomiyaha Awdal Region Cabdirashiid Xasan Mataan, ayaa kormeer ku tegay Garoonka kubbadda cagta ee Xaaji Daahir Stadium oo dib-u-dhis iyo casriyayn lagu wado.
Madaxweynaha oo Oggolaaday Dib-u-dhiska
Agaasimaha Guud ayaa sheegay in cabashooyin qoto dheer oo la xidhiidha xaaladda garoonka loo gudbiyay wasaaradda, maadaama ay tahay hay’adda uga masuulka ah ciyaaraha heer qaran.
Waxa uu tilmaamay in Cabdiraxmaan Maxamed Cabdilaahi (Cirro) si sharaf leh uga aqbalay in si degdeg ah dib loogu dhiso garoonka.
"Markii naloo soo gudbiyay cabashada ku saabsan Garoonka Xaaji Daahir Stadium, waxaanu ku dedaalnay wixii karaankayaga ah, Madaxweynaha Somalilandna si sharaf leh ayuu nooga aqbalay in si degdeg ah loo dhiso,” ayuu yidhi Jiidhe.
Garoonka oo Afar Sanno Xidhnaa
Dhankiisa, Guddoomiyaha Gobolka Awdal Cabdirashiid Xasan Mataan ayaa sheegay in garoonku xidhnaa muddo afar sano ah, isla markaana dib-u-habeyntiisu ay wax weyn ka tari doonto kobcinta ciyaaraha iyo fursadaha dhallinyarada.
"Marka uu hirgalo garoonku, waxa la rajaynayaa in habeen iyo maalinba lagu ciyaari doono,” ayuu yidhi, isaga oo intaa ku daray in qorshuhu yahay in garoomo kale la sameeyo, kuwa jirana la casriyeeyo.
Ugu dambayn, masuuliyiintu waxay ugu baaqeen dhallinyarada inay ilaaliyaan kaabeyaasha cusub ee lagu soo kordhinayo magaalada, si loo hubiyo horumar waara oo dhinaca ciyaaraha ah.
