Waxa kaloo uu bayaamiyay in Somaliland ay tahay mid dimuqraaddiyadi
Michael Rubin oo khabiir lafo-gura siyaasadda iyo ammaanka ayaa ugu baaqay madaxweynaha Maraykanka Donald Trump inuu kala saaro Somaliland iyo Soomaaliya hindisihiisa mamnuucida fiiseyaasha iyo socdaalka ee uu qorshaynayo inuu ku soo rogo dalal kala duwan oo ku yaalla caalamka.
Michael Rubin oo qoraal uu ku daabacay Washington Examiner maanta oo ay soo xigatay Wakaaladda wararka Somaliland ee SOLNA, uu ciwaan uga dhigay:
"Mamnuucidda fiisaha ee Trump waa in ay kala saartaa Soomaaliya iyo Somaliland."
Michael Rubin wuxuu xusay in Soomaaliya ay mudan tahay
in laga mamnuuco fiisaha. Waxaanu tilmaamay in
Muqdisho ay ku faraxsan tahay inay qaadato ballaayiin doollar oo gargaar ah, xilli ay si cad ula jaan-qaadday Shiinaha oo ay shaacisay taageeradiisa.
Khabiirku wuxuu ku eedeeyay in musuqmaasuqa ka jira dawladda Soomaaliya uu dhaliyay in argagixisadu ku soo noqoto Muqdisho.
Michael Rubin wuxuu ku dooday in Somaliland inkastoo aan la aqoonsan; haddana ay si weyn uga duwan tahay Soomaaliya.
Waxa kaloo uu bayaamiyay in Somaliland ay tahay mid dimuqraaddiyadi ka jirto oo madaxdeeda la soo doorto, halka masuuliyiinta Soomaaliyana uu ku sifeeyay qaar "la magacabo."
Mr. Rubin wuxuu xusay inay Somaliland xulafo la tahay Taiwan, halka ay Soomaaliya ay la safan tahay Shiinaha.
Michael Rubin wuxuu majeertay ammaanka caasimada Hargeysa iyo magaalada dekedda ah ee Berberi oo uu xusay inay ka nabadgelyo wansagsan yihiin magaalo kasta oo ku taalla Maraykanka.
Sidoo kale, Mr. Rubin wuxuu intaas ku daray in Somaliland ay si adag u ilaaliso xeebteeda dheer oo ah gaadhaysa masaafo dhan 450 Mayl.
Geesta kale, wuxuu khabiir Michael Rubin caddeeyay in uu ku yaallo Somaliland dugsiga Abaarso oo ardaydii ka baxday dugsigaasi ay wax ka barteen jaamacadaha sarsare ee Maraykanka, kuwaasi oo uu sheegay inay ka shaqeeyaan Maraykanka isla markaana ay dalkooda hooyo ku noqdaan si ay wax ugu qabtaan.
hadhwanaagnews 
