Wargeyska Le Figaro ayaa sheegay in Madaxweyne Emmanuel Macron
Madaxweynaha Mareykanka, Donald Trump, ayaa amar ku bixiyay in la hakiyo dhammaan kaalmada militari ee la siin jirey Ukraine, illaa ay muujiyaan rabitaan dhab ah oo nabad lagu raadinayo. Go’aankan lama filaanka ah ayaa gilgilay xulafada Yurub, halka Ukraine ay wajahday xaalad adag oo dagaalka la xidhiidha.
Xulafada Yurub, gaar ahaan Faransiiska iyo Ingiriiska, ayaa dareemaya cadaadiskii ugu weynaa tan iyo bilowgii dagaalka.
Wargeyska Le Figaro ayaa sheegay in Madaxweyne Emmanuel Macron iyo Ra’iisul Wasaare Keir Starmer ay dadaal ugu jireen xabbad-joojin hal bil ah, balse qorshahoodii uu wiiqmay kadib go’aanka Trump.
Trump ayaa si adag u dhaliilay Yurub, isagoo sheegay in ay aad ugu tiirsan yihiin Mareykanka.
"Haddii Yurub shirayso oo ay ugu dambeyn yidhaahdaan waxba ma tari karno Mareykanka la’aantii, sidee bay u fikirayaan?” ayuu Trump ku weeraray xulafada reer Galbeedka.
Madaxweynaha Ukraine, Volodymyr Zelenskyy, ayaa isku dayaya inuu mideeyo taageerada Yurub, isagoo carrabka ku adkeeyay in Ukraine aysan ka maarmin Mareykanka. Dhanka kale, Kremlin-ka ayaa si dhow ula socda xaaladda. Afhayeenka Dmitry Peskov ayaa sheegay in shirka London uu caddeeyay in Yurub ay doorbidayso maalgelinta dagaalka halkii ay nabad ka shaqeyn lahayd. Ruushka ayaa ka faaiideysanaaya kala shakiga reer Galbeedka.
hadhwanaagnews 
