Gorfeyn
Marka horeba waxa duran
oo reebban adeegsiga sharci ee ereyga "Xukuumadda", waayo hoggaanka
xukuumaddu waa madaxweynaha qaranka, sidaa awgeed, marti-qaad aannu isagu fidin
laguma qori karo "Xukuumadda JSL waxay kugu marti-qaadaysaa••••••••••••".
Midda kale, hadalku waxa uu leeyahay xubin, xilli, xaslin, xuslin,
xarrago, iyo xayn-daab gobeed, haddana
hadalka awowgay wasiir Saajin waa mid intaasiba ka arradan, maxaa yeelay,
maanta xukuumadda Kulmiye balan-qaad lagama doonayo, balse xubnaha wasiiradda
ee xukuumadda Somaliland ku metela gobollada galbeedka Somaliland, waxaa laga
rabay in ay madasha la yimaaddaan, qodobbo waxqabad ah oo si shaacsan u wada
muuqda. Waxaana safka hore kaga jiraan dhawr qodob:
▪︎ Soo dhicinta 4km ee waddada Tog-wajaale ee
nidaamka fashilan ee madaxweyne Biixi u duway daanta bari ee magaalada
Tog-wajaale.
▪︎ Difaacidda dhismaha
waddada Borama-Djibouti ee uu madaxweyne Biixi ku hayo xannibaadda iyo ku
meereysiga saxeexa nidaamka xisaab-celinta.
▪︎ Xadhig ka jaridda
gegida diyaarada Borama,
▪︎ Dhammeystirka
dekedda Saylac ama dekedda Lughaya, ama ugu yaraan inuu yidhaa waxaan ka sidaa
xukuumadda 20 Milyan oo lagu dhisayo dekeddaha gobolka xanniban ee Awdal.
▪︎ Ballaadhinta iyo
dayactirka waddada Kalabaydh- illaa
Borama.
▪︎ Sheegidda
waxqabadkiisii wasiirnimo iyo muujinta heerka metelaaddiisa toddobada sanno.
Taasi oo keeni lahayd kalsooni hoggaamineed iyo aamin siyaasadeed oo ku aaddan
noqoshada madaxweyne ku xigeenka soo socda.
▪︎ Iyo Inuu caddeeyo
aragtidiisa ku aaddan qaddiyadaha toleed, iyo kuwa siyaasadeed ee ku gadaaman
geyiga geeska Afrika.
Haseyeeshee, markii la
waayay hirgalka dhammaan qodobbada sare ku xusan, wuxuu wasiir Saajin doorbiday
inuu hadalkiisa ku soo koobo, is waraysi, xog-wadaag, iyo ciid wanaagsan. Tuduc
gabay ah oo xikmad badan xambaarsan, balse aanan hadda xasuusan abwaankii lahaa
ayaa u dhigneyd "Alla qabay afkana waa yaqaan, waana ka agnaane",
waxa la yaab ah in awowgay wasiir Saajin aannu marna hadalkiisa ku qotomin
duluc-abbaar sugan oo sees looga dhigay inuu hadalkiisu yeesho xubin, xilli,
xaslin, xuslin, xarrago, iyo xayn-daab
gobeed. Sababta ugu wayni na waa inuu ballan-qaadkiisa ugu mudan u adeegsaday
jumlad taban oo u dhigan "Meeshaan doono aan kala dhaco, madaarka Borama
bisha shannaad ee kal danbe inuu dhammaado". Dabcan, weedhayntani waa mid
caddeynaysa inuu wasiir Saajin quus ka joogo ballan-qaad danbe oo xisbiga Kulmiye u sameeyo shacabka
Awdal iyo in dadku mar kale Kulmiye ka dhagaysto dhismaha madaarka Borama oo
dhawr iyo toban jeer hore u soo fashilay.
Ugu danbeyntii, annagu
waxaannu la iman doonaa ballan-qaadyo cad oo taabanaya aragtida siyaasiga ah ee
bulshada, dareennada dadnimo ee asaliga ah, iyo qaddiyadaha toleed ee shacabka
gobollada galbeedka Somaliland. Si kastaba
ahaatee, kulan ujeedkiisu yahay in lagu xumeeyo, ama lagu liido afkaarta
madaxweyne Saylici oo jawaab u ah aragtidiisa dhexdhexaadnimo, iyo qado lagu
gumeynayo hab fekerka gobeed ee bulsho-weynta gobolka aqoonta ee Awdal, marna
ma goyn karto cod cuddoon oo lagu guulaysan karo. Balse waa qodob muujinaya han
hooseynta kaaliyeyaasha siyaasadda madaxweyne Muuse Biixi ee ka soo jeeda
gobollada galbeedka Somaliland. Raggii shalay madaxweyne oo aan 27 sanno gudaha
Borama gaadhi kaga dagin suurtagaliyey inuu dhex lugeeyo oo ku laandheereeyo
ayaa maantana diyaar u ah ridista nidaamka fashil qaran, samatabixinta
qarannimada Somaliland iyo guul-gaadhsiinta is beddel-doonka siyaasiga ah.
Jamal Abdi Muuse,
Xoghayaha Maamul
Wanaagga Iyo Kobcinta Dimuqraadiyadda Xisbiga Waddani.
Hadhwanaagnews marnaba masuul kama aha Aragtida dadka kale. Qoraaga ayaa xumaanteeda, xushmadeeda iyo xilkeeda sida. waxa kaliya oo Hadhwanaagmedia dhiirigalinaysaa, isdhaafsiga aragtida, canaanta gacaliyo talo wadaagga!