hadhwanaag
Hargaysa (HWN) Ex.
Wasiir Axmed Muumin Seed ayaa taageeray Baaqa nabada ee ka so yeedhay Suldaan Maxamuud Guuleed Mire oo kamid ah
salaadiinta Beesha Habarjeclo.
Sidoo kale Seed ayaa
Muuse Biixi iyo Maxamed Kaahin ugu baaqay inay joojiyaan hurinta Colaada, sida
uu ku sheegay qoraalkan hoose oo uu baahiyay.
Gar Buu Maanta Leeyahay
Suldaanku
"Gari Allay Taqaanaaye”
hadalka "Nabada” khuseeya ee ka soo yeedhay Suldaan Maxamuud Guuleed Mire waa
hadal ka turjumaya miisaanka iyo miqaamka xilka uu bulshada u hayo ee
"Suldaanimo”. Suldaanimo waa nabad-doon-nimo, waa xilgudasho, sharaf iyo
cibaado suuban in aad nabadda ku baaqdo, kana shaqayso helitaankeeda marwalba
iyo markan oo kale oo ah xili ay colaada, aanada-qabiilka, iyo arimaha
"Iblaysku” bulshada aafeeyeen. Sida uu yeelay Suldaan Maxamuud na waa sidii loo
baahnaa, laga filayay, garna uu u lahaa ee waan ku hambalyaynayaa, waanan soo
dhawaynayaa baaqaas.
Sidoo kale waxa aan
iyagana hambalyaynayaa Garaadada reer Sool ee Nabada uu ku baaqay Suldaan
Maxamuud soo dhaweeyay, waxaanan leeyahay maanta nabada in laga shaqeeyo ayaan
u baahanahay, in dhiiga wiilasheena ee daadanaya la baajiyo ayaan u baahanahay,
in bulshada siyaasada lagu kala fogeeyay la xasuusiyo riximkii wanaagsanaa iyo
waxa soke ee la isku yahay ayaan u baahanahay ee taas ka shaqeeya.
Dhinaca kale waxa
magac-xumo, xusmad-daro iyo karaama-dhac is huwan ah in madaxda xisbiga Kulmiye
ee talada dalka haysa ee ay hogaaminayaan madaxwayne Biixi iyo saaxiibkii Ina
Kaahin oo ah rag u soo joogay dagaaladii sokeeya, dhadhan durugsan iyo aqoon
wayna u leh "Colaadi waxay gudo iyo waxay gaydo-ba” in ay hadana maanta noqdaan kuwo ka damqan
la’ colaada sokeeye ee dhexdeena ka aloosan iyo sida ay bulshada u sii kala
fogaynayso, iyo sida ay u sii lumayso rajadeenii ahayd in dalkeenu helo
ictiraaf caalami ah oo horseeda jiritaanka dal la wada leeyahay iyo dawlad
bulshada ugu adeegta si siman oo cadaalad ah.
Sidaas aawadeed, waxa
aan ugu baaqayaa xukuumada inay faraha kala baxdo hurinta colaada sokeeye ee ay
cimri-dhererka ka dayaso, kana shaqayso sidii bulshada loo walaalayn lahaa,
amniga dalkana loo sugi lahaa iyada oo gacmaha la is wada haysto.
"Nabad baa Naas la
Nuugo leh”
Axmed Muumin Seed
