hadhwanaagnews
Qiimaha saliidda caalamka ayaa Isniinta maanta ah gaadhay heerkii ugu hooseeyay muddo laba toddobaad gudahood ah, kadib markii suuqyada caalamku muujiyeen rejo weyn oo ku saabsan in Maraykanka iyo Iran ay ku sii dhowaanayaan heshiis nabadeed, kaas oo gacan ka geysan kara dejinta xiisadda Bariga Dhexe iyo dib u furista marin-biyoodka muhiimka ah ee Strait of Hormuz.
Shidaalka Brent crude ayaa hoos u dhacay ku dhawaad $5 halkii foosto, isagoo gaadhay heer ka hooseeya $100, halka shidaalka Maraykanka ee West Texas Intermediate (WTI) uu isna si weyn u dhacay, isaga oo ku dhow $91 halkii foosto. Labada nooc ee shidaalka ayaa sidaas ku gaadhay heerkii ugu hooseeyay tan iyo 7-dii May, taasoo muujinaysa in suuqyadu si dhow ula socdaan isbeddelka siyaasadeed ee Bariga Dhexe.
Madaxweynaha Maraykanka Donald Trump ayaa Sabtidii sheegay in Washington iyo Iran ay "inta badan ka wada xaajoodeen” heshiis is-afgarad ah, kaas oo dib u furi kara Strait of Hormuz, marin-biyoodka ay maraan ku dhawaad shan meelood meel shidaalka iyo gaaska dabiiciga ah ee dunida loo dhoofiyo. Si kastaba ha ahaatee, Trump ayaa Axaddii sheegay in wali ay jiraan arrimo adag oo labada dhinac isku khilaafsan yihiin, islamarkaana aan lagu degdegi doonin heshiiska.
Falanqeeyayaasha dhaqaalaha ayaa sheegaya in hoos u dhaca qiimaha saliiddu uu ka dhashay rajada laga qabo in sahayda shidaalka ee caalamka ay dib caadi ugu soo laabato, inkasta oo ay weli jiraan walaacyo la xiriira dib u soo kabashada kaabayaasha shidaalka iyo suurtagalnimada in wadaxaajoodyadu dib u hakadaan.
