HADHWANAAGNEWS
Qorshaha xukuumadda Somaliland ee lagu xoojinayey nabadda gobollada Awdal iyo Selel ayaa gaadhay guul muuqata, kadib dadaallo wadajir ah oo ay sameeyeen madax-dhaqameedka, waxgaradka, dhallinyarada iyo masuuliyiinta dawladda.
Wafti sare oo ay hoggaaminayeen wasiirro ka tirsan xukuumadda, isla markaana ay ku wehelinayeen hoggaanka ciidanka iyo madax-dhaqameedyo ka kala socday labada gobol, ayaa ku guuleystay waanwaantii lagu soo afjarayay colaaddii u dhaxeysay beelaha. Waxa ay si cad u shaaciyeen in nabad si rasmi ah loo isla qaatay.
Sidoo kale, digniin adag ayaa loo diray cid kasta oo isku dayda inay carqaladeyso heshiiska nabadeed, iyadoo la adkeeyey in tallaabo sharci ah laga qaadi doono cid kasta oo jebisa nabadda la gaadhay.
Bulshada iyo hoggaamiyeyaasha deegaanka ayaa isku raacay in nabaddu tahay lama taabtaan, isla markaana aan lagu xidhin wax shuruud ah. Waxa ay carrabka ku adkeeyeen in khasaaraha colaadaha ka dhasha aanu dib loo soo celin karin, taas oo muujinaysa muhiimadda ay leedahay doorashada nabadda iyo wada noolaanshaha.
Masuuliyiinta xukuumadda ayaa tilmaamay in nabaddu tahay furaha horumarka, iyagoo bogaadiyay doorka muuqda ee ay qaateen madax-dhaqameedka. Waxay sidoo kale xuseen in nabadgelyadu si toos ah u taageerto adeegyada bulshada sida waxbarashada iyo horumarinta deegaanka.
Gaba-gabadii, xukuumaddu waxay caddeysay inay si buuxda uga go’an tahay sugidda nabadgelyada, isla markaana aanay cidna uga daba fadhiisan doonin ilaalinta amniga iyo xasilloonida gobollada Awdal iyo Selel.
