hadhwanaagnews
Fadhigii todobaadkan ee Golaha Guurtida Somaliland, oo uu shirguddoominayay Guddoomiyaha Golaha, Mudane Saleebaan Maxamuud Aadan, ayaa mudaneyaasha lagu wargeliyay inay gudo galaan dooda Xeerka Kala-xadaynta Nidaamka Xukuumadda iyo Hay’adaha Madaxa-bannaan, Xeer Lr.71/2025.
Ujeeddada xeerkan cusub ayaa ah in lagu nidaamiyo si hufan kala shaqaynta iyo kala madax-bannaanida hay’adaha qaranka iyo xukuumadda, iyadoo la xoojinayo isla xisaabtanka, hufnaanta iyo waajibaadka dastuuriga ah ee hay’adaha dowliga ah. Hindisahan sharciyeed wuxuu qayb ka yahay dadaallada lagu hormarinayo shuruucda dalka, loona abuuri doono hannaan dowladeed oo waafaqsan xaaladda iyo baahida bulshada Somaliland.
Mudaneyaashii dooda ka qayb qaatay ayaa inta badan soo jeediyay in xeerka lagu ansixiyo sidii uu uga soo gudbay Golaha Wakiillada iyo xukuumadda JSL.
Intaas kadib, Guddoomiyaha Golaha Guurtida, Mudane Saleebaan Maxamuud Aadan, ayaa cod geliyay xeerka, waxaana natiijada codbixinta lagu dhawaaqay: 46 Mudane ayaa u codeeyay, 6 Mudane ayaa diiday, 3 Mudane ayaana aamusey, halka Guddoomiyuhu aanu codeyn. Sidaas ayaa xeerka ku ansaxay, wuxuuna hadda noqday sharci rasmi ah oo lagu dhaqan gelin doono si loo xaqiijiyo madax-bannaanida hay’adaha iyo hufnaanta maamulka dalka.
